वणी टाईम्स न्युज | झरीजामणी तालुक्यातील एका विवाहित महिलेला मोबाईलवर अश्लील संदेश पाठवून तिचा लैंगिक छळ केल्याची धक्कादायक घटना उघडकीस आली आहे. सदर प्रकरणी पीडित महिलेच्या तक्रारीवरून जामणी येथील एका युवकाविरुद्ध पाटण पोलिस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी महिला (नाव गोपनीय) या आपल्या घरी असताना दि. 15 मार्च 2026 रोजी दुपारी सुमारे 2.56 वाजताच्या सुमारास आरोपी दत्ता परचाके (51) यांनी त्यांच्या मोबाईलवरून फिर्यादी महिलेच्या मोबाईलवर अश्लील व अपमानास्पद मजकूर असलेला संदेश पाठविला.
सदर संदेशाबाबत महिलेनं आरोपीला फोन करून विचारणा केली असता, त्याने संदेश पाठविल्याचे नाकारले. त्यानंतर काही वेळाने आरोपी महिलेच्या घरी आला असता, महिलेने त्याला संबंधित संदेश दाखवून जाब विचारला. मात्र आरोपीने आपल्या मोबाईलमध्ये असा कोणताही संदेश नसल्याचे सांगत टाळाटाळ केल्याचे तक्रारीत नमूद आहे.
महिलेने आरोपीला सायंकाळपर्यंत खुलासा करण्यास सांगितले होते, मात्र कोणताही प्रतिसाद न मिळाल्याने आरोपीने जाणूनबुजून अश्लील संदेश पाठवून तिची लज्जा भंग करण्याचा व लैंगिक छळ केल्याचा आरोप करण्यात आला आहे.या प्रकरणी पाटण पोलिस ठाण्यात आरोपीविरुद्ध भारतीय न्याय संहिता (BNS) कलम 75(1)(iv) अंतर्गत गुन्हा दाखल करण्यात आला असून पुढील तपास सुरू आहे.
