वणी टाईम्स न्युज: वणी तालुक्यात रेती तस्करीवर अंकुश ठेवण्यासाठी महसूल विभागाने कारवाईचे सत्र सुरू ठेवले असून, दोन वेगवेगळ्या घटनांमध्ये रेती वाहतूक करणाऱ्या वाहनांवर कारवाई करत वाहने जप्त करण्यात आली आहेत. जप्त केलेली वाहने रापनि वणी डेपो आवारात उभी करण्यात आली आहे. महसूल प्रशासनाची रेती तस्करी विरोधात सतत कारवाया सुरु असताना रेती तस्कर जुमानत नसल्याचे चित्र सुद्धा पहायला मिळत आहे.
वणी-यवतमाळ बायपासवरील राजूर रेल्वे क्रॉसिंगजवळ शुक्रवारी दुपारी 4.15 वाजता सुमारास वरोरा येथून रेती घेऊन येत असलेल्या हायवा ट्रकवर कारवाई करण्यात आली. ट्रक चालकाकडे उपलब्ध रेती वाहतूक पास मधील माहिती आणि प्रत्यक्ष रेती टाकण्याच्या ठिकाणात विसंगती आढळल्याने तहसीलदार वणी यांच्या मार्गदर्शनाखाली जमादार प्रशांत गोहने, नायब तहसीलदार रामचंद्र खिरेकार, महसूल सहाय्यक अशोक चौधरी, ग्राम महसूल अधिकारी सुमेध अघम यांनी 5 ब्रास रेतीसह ट्रक क्रमांक MH40 BG 5080 जप्त करून तो वणी येथील एस. टी. डेपोमध्ये लावला. सदर प्रकरणी पुढील कायदेशीर कारवाई सुरू आहे. जप्त करण्यात आलेला हायवा ट्रक हा वरोरा येथील ज्ञानेश्वर चांभारे याच्या मालकीचा असल्याचे कळते.
वणी मुकुटबन मार्गावर चेंडकापूर जवळ विदर्भा नदीतून नियमितपणे रेतीची तस्करी केल्या जात असल्याची माहिती मिळाल्यानंतर नायब तहसीलदार रामचंद्र खिरेकार, ग्राम महसूल अधिकारी नमो शेंडे आणि अशोक ब्राम्हणवाडे यांच्या पथकाने नवरगाव बस फाटा येथे सापळा लावून रेतीची चोरटी वाहतूक करताना बाबाराव डाहुले यांच्या ट्रॅक्टर पकडला. पथकाने ट्रॅक्टर, ट्रॉली तसेच 1 ब्रास रेती जप्त करून ट्रॅक्टर वणी एस. टी. डेपोमध्ये लावले आहे. वाहन मालक यांना नोटीस बजावून पुढील कार्यवाही करण्यात येणार आहे.
