वणी टाईम्स न्युज : हल्ली समाजात महिला-मुलींच्या सुरक्षिततेचा प्रश्न दिवसेंदिवस गंभीर होत चालला आहे. सार्वजनिक ठिकाणी असो वा घराच्या चारभिंतीत, नराधमाची नजर टपलेलीच असते. अशीच एक संतापजनक घटना मारेगाव तालुक्यातील धार्मिक स्थळ म्हणून प्रख्यात पांडवदेवी येथे मंगळवार 22 ऑक्टोबर रोजी उघडकीस आली. मैत्रिणी सोबत गायधन यात्रा बघायला आलेल्या अल्पवयीन मुलीवर एका नराधम युवकाने बळजबरीने जंगलात नेऊन दुष्कर्म केला.
मारेगाव ते यवतमाळ मार्गावर जळका फाट्यापासून एक ते दीड किलोमीटर अंतरावर जंगलात नाल्यालगत पुरातन हेमाडपंथी पांडवदेवी मंदिर आहे. येथे दरवर्षी गाय गोधनच्या दिवशी मोठी जत्रा भरत असते. ही जत्रा बघायला हजारों भाविक पांडवदेवी मंदिरात येतात. मारेगाव तालुक्यातील एका गावातील काही मैत्रिणी मिळून यात्रा बघण्यासाठी पांडवदेवी येथे आल्या होत्या. दरम्यान गर्दीमध्ये एक 14 वर्षीय बालिका आपल्या मैत्रिणीपासून भरकटली. मैत्रिणीच्या शोधात एकटी फिरत असताना नराधमाची वाईट नजर तिच्यावर पडली.
मैत्रिणीच्या शोधून देण्याचा बहाणा करून नराधमाने तिला मंदिरापासून अंतरावर जंगलात नेले व तिथे एका विहिरीजवळ त्या अल्पवयीन मुलीवर बळजबरीने दुष्कर्म करून पळून गेला. अत्याचाराच्या वेदनेपासून तडफडत मुलगी कशीबशी रस्त्यावर आली व तिनं घडलेली घटना आपल्या काकांना सांगितली. त्यानंतर तिच्या पालकांना याबाबत माहिती देऊन मारेगाव पोलिस ठाण्यात तक्रार नोंदविण्यात आली.
घटनेचा गांभीर्य लक्षात घेऊन मारेगावचे प्रभारी ठाणेदार पो. नि. गोपाल उंबरकर यांनी तत्काळ आरोपीच्या शोधात पोलीस पथक रवाना केले. काही वेळातच पोलिसांनी नराधम आरोपीची ओळख पटवून मारेगाव तालुक्यातीलच आवळगाव येथील कैलास सूर्यभान आत्राम (28) याची मुसक्या आवळल्या. नराधम आरोपी विरुद्ध मारेगाव पोलिस ठाण्यात कलम 64,96 BNS तसेच पॉक्सो यांच्या कलम 4,6 अंतर्गत गुन्हा दाखल केला आहे. घटनेचा पुढील तपास मारेगाव पोलीस करीत आहे .
