वणी टाईम्स न्युज: दुर्गादेवी विसर्जन मिरवणुकीच्या बंदोबस्तादरम्यान वणी पोलिसांनी दीपक चौपाटी परिसरात धाड टाकत वरली मटका व ‘चेंगड’ नावाचा हारजीतचा जुगार खेळविणाऱ्या इसमास रंगेहाथ पकडले. या कारवाईतून रोख रक्कम व जुगार साहित्य जप्त करण्यात आले असून, दोघांविरोधात गुन्हा दाखल करण्यात आला आहे.
ही कारवाई दिनांक 4 ऑक्टोबर 2025 रोजी दुपारी 2.15 वाजता सुमारास करण्यात आली. स्था.गुन्हे शाखा यवतमाळ व वणी पोलीस ठाण्याचे सपोनि दत्ता पेंडकर यांच्या पथकाने दीपक चौपाटीवरील सलिम चिकन सेंटर समोरच्या मोकळ्या जागेवर ही धाड टाकली. मुखबिराकडून मिळालेल्या खात्रीलायक माहितीनुसार हे पथक घटनास्थळी पोहोचले असता, काही इसम जुगार खेळत असल्याचे निदर्शनास आले.
छापा टाकल्यावर पोलिसांनी एका इसमास पकडले, तर इतर काही जण पसार झाले. पकडलेल्या इसमाची ओळख संदीप प्रभाकर मडावी (40), रा. इंदिरा चौक, वणी अशी झाली. त्याच्याकडून पोलिसांनी 12 हजार 200 रुपये रोख रकमेसह जुगाराचे साहित्य जप्त केले. चौकशी दरम्यान आरोपी संदीप मडावी याने सांगितले की तो आरीफ रहमान खलील रहमान ,रा. काळे ले-आउट, वणी याच्याकडे रोजंदारीवर काम करतो व त्याच्याच सांगण्यावरून हा जुगार चालवितो.
या प्रकरणात वणी पोलिसांनी संदीप मडावीला ताब्यात घेतले असून, मुख्य आरोपी आरीफ रहमान फरार आहे. दोघांवर कलम 12(अ) महाराष्ट्र जुगार प्रतिबंधक कायदा तसेच कलम 49 भारतीय न्याय संहिता (BNS) अंतर्गत गुन्हा नोंद करण्यात आला आहे. पुढील तपास पोलीस उपनिरीक्षक दत्ता पेंडकर यांच्या मार्गदर्शनाखाली सुरूआहे.
