वणी टाईम्स न्युज : शहरातील पंचशील नगर येथे ८ डिसेंबर २०२५ रोजी पकडण्यात आलेल्या सुगंधित तंबाखू तस्करी प्रकरणात आता गंभीर व खळबळजनक वळण लागले आहे. या प्रकरणातील तपासावर प्रश्नचिन्ह उपस्थित करत युवासेनेचे उपजिल्हा प्रमुख अजिंक्य सुभाष शेंडे यांनी थेट वणी पोलीस प्रशासनावर तंबाखू माफियांशी संगनमत असल्याचा गंभीर आरोप केला आहे. यासंदर्भात त्यांनी जिल्हा पोलीस अधीक्षक, यवतमाळ यांना सविस्तर निवेदन सादर केले आहे.
निवेदनात नमूद केल्यानुसार, जागरूक नागरिकांनी 112 या आपत्कालीन क्रमांकावर दिलेल्या माहितीवरून पोलिसांनी पंचशील नगर येथे मोठ्या प्रमाणात सुगंधित तंबाखूची खेप जप्त केली होती. या प्रकरणात अन्न व औषध प्रशासनाने (FDA) अत्यंत गंभीर कलमान्वये गुन्हे दाखल केले असतानाही, प्रत्यक्ष गुन्ह्यात वापरण्यात आलेले वाहन (MH-24-BL-7051) आजतागायत जप्त करण्यात आलेले नाही, ही बाब संशयास्पद असल्याचे शेंडे यांनी म्हटले आहे.
सीसीटीव्ही फुटेज, प्रत्यक्ष साक्षीदार तसेच वाहन चालक व मालकाची संपूर्ण माहिती उपलब्ध असतानाही एक महिन्याहून अधिक कालावधी उलटून वाहनावर कारवाई न होणे म्हणजे आरोपींना वाचवण्याचा जाणीवपूर्वक प्रयत्न असल्याचा आरोप करण्यात आला आहे. तपासातील हा ‘अर्थपूर्ण विलंब’ तस्करीमागील आर्थिक साखळी आणि मुख्य सूत्रधार उघडकीस येण्यास अडथळा ठरत असल्याचेही निवेदनात नमूद आहे.
युवासेनेने या प्रकरणात तीन ठोस मागण्या केल्या आहेत. संबंधित वाहन तात्काळ जप्त करून त्याच्या मालक व चालकावर कठोर कारवाई करावी, FDA ने नोंदवलेल्या गुन्ह्यानुसार तंबाखू मागवणाऱ्या मुख्य आरोपीला त्वरित अटक करावी, तसेच तपासात दिरंगाई करणाऱ्या संबंधित तपास अधिकाऱ्याला तात्काळ निलंबित करावे.
दरम्यान, येत्या ४८ तासांत ठोस कारवाई न झाल्यास तीव्र आंदोलन छेडण्याचा इशारा देण्यात आला असून, या प्रकरणाकडे स्वतः लक्ष घालून जनतेचा पोलिसांवरील विश्वास अबाधित ठेवावा, अशी मागणी पोलीस अधीक्षकांकडे करण्यात आली आहे. या निवेदनामुळे वणी शहरात मोठी चर्चा सुरू झाली असून पोलीस प्रशासनाची पुढील भूमिका काय असणार, याकडे सर्वांचे लक्ष लागले आहे.
तंबाखू तस्कर मकसूदला राजकीय संरक्षण ?
मिळालेल्या माहितीनुसार चंद्रपूर जिल्ह्यातील मकसूद नामक व्यक्ती हा वणी तालुक्यात गुटखा, तंबाखू तस्करीचा मुख्य सूत्रधार आहे. पंचशील नगर येथे पकडण्यात आलेला अवैध तंबाखूचा मालकही मकसूद असल्याची चर्चा आहे. मात्र त्याने स्थानिक नातेवाईक व एका राजकीय पक्षाचे नेत्याच्या मध्यस्थीने त्याच रात्री प्रकरण हॅण्डल केल्याची खमंग चर्चा शहरात पसरली. त्यामुळे घटनेच्या एका महिन्यानंतरही तंबाखू तस्करीची तपास थंड बस्त्यात असल्याचे बोलले जाते.
