वणी टाईम्स न्युज : किरायाने राहणाऱ्या एका अनुसूचित जातीतील महिलेला घर रिकामे न केल्याच्या कारणावरून चार जणांनी एकत्र येऊन शिवीगाळ, जातीवाचक अपशब्द व धमकी दिल्याची घटना घडली आहे. या प्रकरणी जैन लेआऊट वणी येथील दोन महिलांसह चार जणांवर पोलीस ठाण्यात अनुसूचित जाती व जमाती अत्याचार प्रतिबंधक कायद्यानुसार चार जणांविरुद्ध गुन्हा दाखल करण्यात आला आहे.
फिर्यादी निशा मिलिंद गायकवाड (36), रा. जैन लेआऊट, वणी यांनी वणी पोलीस ठाण्यात दिलेल्या फिर्यादीत म्हटले आहे की, त्या आपल्या कुटुंबासह आकाश गव्हाणे यांच्या घरात मागील तीन महिन्यांपासून भाड्याने राहत आहेत. घर घेतल्यानंतर अवघ्या 15 दिवसांतच घर खाली करण्यास सांगण्यात आले. मात्र, दि. 23 जुलै 2025 रोजी सायंकाळी 8 वाजताच्या सुमारास घरमालक आकाश रामदास गव्हाणे (वय 25) यांनी घरी येऊन “घर का खाली केलं नाही” असे म्हणून शिवीगाळ करण्यास सुरुवात केली.
त्यावेळी फिर्यादी महिलेने पती ड्युटीवर असल्याचे सांगत चर्चा नंतर करण्याचे सांगितले. यानंतर आकाश गव्हाणे यांचे वडील रामदास गव्हाणे (60), आई (50), आणि बहिण (22) हेही घटनास्थळी आले. त्यांनीही फिर्यादीस जातीवाचक शिवीगाळ केली, धमकी दिली की “घर रिकामं केलं नाही तर सामान रस्त्यावर फेकून देऊ,” आणि मारहाण करण्यास धावून आले.
या प्रकरणी वणी पोलीस ठाण्यात आरोपी घरमालक रामदास गव्हाणे, आकाश रामदास गव्हाणे, व दोन महिला यांच्याविरुद्ध अनुसूचित जाती-जमाती अत्याचार प्रतिबंधक कायदा 1989 चे कलम 3(1)(r), 3(1)(8), 3(2)(va) तसेच भारतीय न्याय संहिता 2023 चे कलम 351(2) अंतर्गत गुन्हा दाखल करण्यात आला आहे. पुढील तपास वणी पोलीस करीत आहेत.
