प्रतिबंधित अनधिकृत कापूस बियाण्यांचा साठा जप्त

वणी टाईम्स न्युज : तालुक्यातील पळसोनी येथे भारत सरकारने प्रतिबंधित केलेल्या अनधिकृत कापूस बियाण्यांची विक्री सुरू असल्याची माहिती मिळाल्यानंतर कृषी विभाग व पोलिसांनी संयुक्त कारवाई करत मोठा साठा जप्त केला. या प्रकरणी एका व्यक्तीविरुद्ध विविध कायद्यांन्वये गुन्हा दाखल करण्यात आला आहे.

जिल्हा गुणवत्ता नियंत्रण निरीक्षक तथा जिल्हा अधीक्षक कृषी अधिकारी कार्यालय, यवतमाळ यांच्या फिर्यादीवरून आरोपी अरुण शंकर भट (45), रा. पळसोनी ता. वणी जि. यवतमाळ याच्याविरुद्ध बियाणे अधिनियम 1966 व पर्यावरण संरक्षण अधिनियम 1986 अंतर्गत गुन्हा नोंद करण्यात आला आहे.

पोलीसांनी दिलेल्या माहितीनुसार, दि. 6 मे 2026 रोजी रात्री 9 ते 9.20 वाजताच्या दरम्यान आरोपीच्या राहत्या घरावर छापा टाकण्यात आला. त्यावेळी आरोपी प्रतिबंधित व अनधिकृत कापूस बियाण्यांचा साठा स्वतःजवळ बाळगून विक्री करत असल्याचे निदर्शनास आले.

या कारवाईत विविध कंपन्यांच्या नावाने विक्रीसाठी ठेवण्यात आलेली कापूस बियाण्यांची एकूण 81 पाकिटे जप्त करण्यात आली. जप्त मुद्देमालाची किंमत सुमारे 1 लाख 15 हजार 70 रुपये इतकी असल्याचे सांगण्यात आले. काही बियाण्यांचे नमुने बीज परीक्षण प्रयोगशाळेत तपासणीसाठी लाखेने सीलबंद करून वेगळे ठेवण्यात आले आहेत.

जप्त करण्यात आलेल्या बियाण्यांमध्ये R-659 RR 5G, PUSHA 5G, माऊली-5, SILVER 5G, KAVERI SEEDS 5G, GALAXY HYPER, JUMBO 5G PREMIUM, SURAKSHA तसेच HARYALI 702 5G आदी विविध प्रकारच्या हायब्रीड कापूस बियाण्यांचा समावेश आहे. या प्रकरणाचा पुढील तपास पोहेकॉ अविनाश चिकराम, पोलीस स्टेशन वणी हे करीत आहेत.