वणी टाईम्स न्युज : मराठी साहित्यात नवे प्रवाह निर्माण करणाऱ्या वणीतील कवयित्री व जिल्हा परिषद शाळा ढाकोरी येथील शिक्षिका माधुरी काळे कावडे यांच्या ‘मधुमनतरंग’ या काव्यसंग्रहाचे प्रकाशन नुकतेच ‘गौरव अभिजात मराठी 2025’ या राज्यस्तरीय कार्यक्रमात थाटात पार पडले. मराठीचे शिलेदार बहुउद्देशीय संस्था, नागपूर यांच्या वतीने भारतरत्न मौलाना अबुल कलाम आझाद संशोधन केंद्र व सभागृह, छत्रपती संभाजीनगर येथे आयोजित या भव्य समारंभात एकूण २१ काव्यसंग्रहांचे प्रकाशन करण्यात आले.
या प्रकाशन सोहळ्याला संमेलनाध्यक्ष म्हणून साहित्यरुचक आमदार विक्रम काळे, उद्घाटक डॉ. पद्मा जाधव, प्रमुख अतिथी म्हणून शिवव्याख्याते डॉ. बालाजी जाधव, यशवंतराव चव्हाण सेंटरचे सचिव नरेश शेळके, आयोजक ए. बी. पठाण, प्रसिद्ध कवयित्री स्वाती मराडे आटोळे (पुणे), अशोक लांडगे व अरविंद उरकुडे आदी मान्यवर उपस्थित होते.
कार्यक्रमात ‘गौरव अभिजात मराठी 2025’ या विशेषांकाचेही प्रकाशन मुख्य संपादक राहुल पाटील यांच्या हस्ते करण्यात आले. कवयित्री माधुरी काळे कावडे यांचा मराठीचे शिलेदार संस्थेच्यावतीने शाल, मानपत्र, सन्मानचिन्ह, विशेषांकाची प्रत व पुष्पगुच्छ देऊन कौटुंबिक सत्कार करण्यात आला. यावेळी प्रकाश काळे, श्रीनिधी व श्रीशा काळे, ज्योती वाभीटकर, कृतिका व मिनल वाभीटकर, वेद भोयर इत्यादी कुटुंबीय उपस्थित होते.
कार्यक्रमाचे सूत्रसंचालन सविता पाटील ठाकरे, प्रशांत ठाकरे व कवी विष्णू संकपाळ यांनी केले. आभारप्रदर्शन कवयित्री वर्षा मोटे यांनी केले. महाराष्ट्रभरातून आणि राज्याबाहेरून आलेल्या साहित्यप्रेमींमुळे सोहळ्याला मोठा प्रतिसाद मिळाला.
