वणी टाईम्स न्युज : तालुक्यातील उकणी, पिंपळगाव, निलजई, बोरगाव, जुनाड या गावांसह संपूर्ण परिसरातील रस्त्यांच्या दुरवस्थेमुळे नागरिकांच्या समस्या दिवसेंदिवस गंभीर होत आहेत. रस्त्यांची दुरुस्ती, शैक्षणिक सुविधा, जमिनीचा मोबदला व शेतीला होणाऱ्या नुकसानीबाबत शासनाचे लक्ष वेधण्यासाठी सोमवार, दिनांक 25 ऑगस्ट 2025 रोजी सकाळी 6 वाजता पासून उकणी खाण रोडवरील बस स्थानक येथे चक्का जाम आंदोलन करण्यात येणार आहे.
महाराष्ट्र प्रदेश काँग्रेस कमिटी सचिव संजय खाडे यांचे नेतृत्वात आयोजित या आंदोलनात उकणी खाणी ते जुनाडा फाट्यापर्यंत रस्त्याची दुरुस्ती व काँक्रिटीकरण, बोरगाव फाटा, भालर वसाहत, भालरगाव ते वणी रोडचे डांबरीकरण, बेलोरा पुलापासून नायगाव खाणीपर्यंत रोडचे काँक्रिटीकरण, नायगाव खाण ते निलजई खाणीपर्यंत रोडचे काँक्रिटीकरण, निलजई खाण क्र. 2 ते उकणी पर्यंत रस्त्याचे डांबरीकरण, निलजई खाण क्र. 1 ते सुंदरनगर पर्यंत रस्त्याचे डांबरीकरण, नायगाव चौफुली – बेलोरा – सुंदर नगर रस्त्याचे डांबरीकरण, उकणी मॅगझीन गोडावून ते उकणी खाणी पर्यंत रस्त्याचे डांबरीकरण व जुनाडा पुलाला अप्रोच रोड तात्काळ तयार करण्याची मागणी करण्यात येणार आहे.
शिवाय उकणी, पिंपळगाव, जुनाडा, आणि प्रगती नगर येथील शाळकरी मुलांसाठी अतिरिक्त बससेवा, उकणी गावासाठी स्वतंत्र स्कूल बस सेवा तात्काळ सुरु करणे, उकणी गावातील उर्वरित 15% जमीन तात्काळ संपादित करणे, गावकऱ्यांना घरांसाठी वाढीव मोबदला देणे, उकणी गावाचे वणी जवळ तात्काळ पुनर्वसन करणे, उकणी, पिंपळगाव, जुनाडा, कोलारपिंपरी, ब्राम्हणी, आणि निळापूर रोडच्या बाजूच्या शेतकऱ्यांच्या शेतमालाचे धुळीमुळे झालेले नुकसान भरपाई म्हणून योग्य मोबदला देण्याची मागण्या प्रामुख्याने शासनापुढे मांडणार आहे.
या आंदोलनाचे नेतृत्व महाराष्ट्र प्रदेश काँग्रेस कमिटी सचिव संजय खाडे करणार असून मोठ्या संख्येने स्थानिक नागरिक, शेतकरी, महिला व विद्यार्थी या चक्काजाम आंदोलनात सहभागी होणार आहेत. अशी माहिती आयोजकांनी दिली आहे.
