वणी टाईम्स न्युज : काँग्रेस पक्षाने संघटनात्मक बळकटीसाठी महत्त्वाचे पाऊल उचलत वणीतील काँग्रेस नेते तथा प्रदेश सचिव संजय खाडे यांच्यावर पूर्व नागपूर विधानसभा मतदारसंघाच्या प्रभारीपदाची जबाबदारी सोपवली आहे. अचलपूर मतदारसंघातील त्यांच्या प्रभावी कार्याची दखल घेत पक्षश्रेष्ठींनी ही नियुक्ती केली असून, प्रदेशाध्यक्ष हर्षवर्धन सपकाळ यांच्या आदेशानुसार हा निर्णय घेण्यात आला आहे.
संजय खाडे हे परिसरात शेतकरी व कामगार नेते म्हणून ओळखले जातात. विविध आंदोलन, मोर्चे आणि जनआंदोलनांच्या माध्यमातून त्यांनी शेतकरी व कामगारांच्या प्रश्नांना न्याय मिळवून देण्यासाठी सातत्याने लढा दिला आहे. अचलपूर मतदारसंघात त्यांनी ग्रामीण भागात पक्ष संघटन मजबूत करत जनसंपर्क वाढवण्यावर विशेष भर दिला होता. त्यांच्या या कामगिरीच्या आधारे आता त्यांच्यावर पूर्व नागपूरसारख्या राजकीयदृष्ट्या महत्त्वाच्या शहरी मतदारसंघाची जबाबदारी सोपवण्यात आली आहे.
पूर्व नागपूर मतदारसंघ हा नागपूर शहरातील अत्यंत महत्त्वाचा राजकीय पट्टा मानला जातो. एकेकाळी काँग्रेसचा बालेकिल्ला असलेल्या या मतदारसंघात विविध समाजघटक, कामगार वर्ग, व्यापारी आणि युवकांचा मोठा प्रभाव आहे. नागरी प्रश्न, स्थानिक विकासकामे आणि संघटनात्मक ताकद या मुद्द्यांवर येथे निवडणुकीचे गणित ठरत असल्याने या मतदारसंघाकडे विशेष लक्ष दिले जाते.
🗣️ “पूर्ण ताकदीने काम करणार” – संजय खाडे
नियुक्तीबाबत प्रतिक्रिया देताना संजय खाडे म्हणाले,
“पक्षाने माझ्यावर दाखवलेला विश्वास ही माझ्यासाठी अभिमानाची बाब आहे. अचलपूरमधील कामाच्या बळावर आता पूर्व नागपूरमध्येही पक्ष संघटन मजबूत करण्यासाठी पूर्ण ताकदीने काम करणार आहे. सर्वसामान्य नागरिक, युवक, कामगार व महिलांशी थेट संवाद साधून तसेच स्थानिक पदाधिकारी व नेत्यांशी समन्वय साधून संघटन बळकट करण्यावर भर देणार आहे.” खाडे यांनी आपल्या नियुक्तीचे श्रेय प्रदेशाध्यक्ष हर्षवर्धन सपकाळ, खासदार प्रतिभा धानोरकर आणि जिल्ह्यातील ज्येष्ठ नेत्यांना दिले आहे.
🔍 कार्यकर्त्यांमध्ये उत्साहाचे वातावरण
संजय खाडे यांच्या नियुक्तीमुळे काँग्रेस कार्यकर्त्यांमध्ये उत्साहाचे वातावरण निर्माण झाले असून, आगामी काळात पूर्व नागपूरमध्ये पक्ष संघटन अधिक मजबूत होईल, अशी अपेक्षा व्यक्त केली जात आहे.
