वणी टाईम्स न्युज : शहरातील वरोरा मार्गावरील एका बारचे मालक व मॅनेजरला तब्बल 8 ते 10 महिलांनी मारहाण करीत डोळ्यात तिखट पावडर फेकला. शनिवारी दुपारी 1.30 वाजता घडलेल्या या घटनेबाबत न्यू ज्योती बार अँड रेस्टॉरंटचे मालक मनोज उरकुडे यांच्या तक्रारीवरून वणी पोलीस ठाण्यात 4 महिलांसह 8 जणांवर विविध कलमान्वये गुन्हा दाखल करण्यात आला आहे. या घटनेमुळे परिसरात एकच खळबळ उडाली आहे.
मिळालेल्या माहितीनुसार, दिनांक 12 सप्टेंबर रोजी संध्याकाळी 6 वाजता सुमारास शेखर अशोक दुर्गमवार (30), रा. राजूर कॉलरी, हा एका मित्रासह न्यू ज्योती बारअँड रेस्टॉरंट मध्ये दारू पिण्यास आला होता. दारू पिल्यानंतर बिलाची रक्कम न देता पळून जाण्याचा प्रयत्न केले असता बार कर्मचाऱ्यांनी त्याला पकडले. तेव्हा त्याने पैसे नसल्याचे सांगितले. त्यानंतर त्याने नातेवाईकांना बोलावून घेतले व बिलाची रक्कम दिली. मात्र निघताना शेखरने बार मालकाला धमकी दिली की “उद्या बघ, तुला आयुष्यभर लक्षात राहील” असे म्हणत तो निघून गेला.
शनिवार 13 सप्टेंबर रोजी दुपारी 1.30 वाजता अचानक 8 ते 10 महिला प्लॅस्टिक पाईप व लाकडी दांडके हातात घेऊन बारमध्ये घुसल्या. महिलांनी वरच्या मजल्यावर जाऊन बार मालक मनोज उरकुडे यास अश्लील शिवीगाळ केली तसेच त्याच्या डोळ्यात तिखट पावडर फेकला. त्यामुळे त्याच्या डोळ्यात जळजळ होऊन काही काळ तो अंधळा झाला. त्याचवेळी महिलांनी त्याच्यावर हल्ला चढवून मारहाण करून खाली ओढले. दरम्यान, काऊंटरवर बसलेल्या मॅनेजर आशिष भास्कर खाडे यालाही या महिलांनी लक्ष्य केले. काचेचे ग्लास फेकून त्याला जखमी करण्यात आले. मारहाणीमध्ये बार मालकाच्या डोक्यावर, मानेवर व हातावर मार लागला असून मॅनेजरलाही हात व पाजर्यावर दुखापत झाली आहे.
हल्लेखोर महिलांनी “आमच्या मुलाला काल दारूचे पैसे का मागितलेस ? असे म्हणत शिवीगाळ केली. तसेच “आम्हीच पोलिस ठाण्यात जाऊन तुझ्यावर छेडखानीची रिपोर्ट देऊ” अशी धमकीही दिली. या प्रकरणी बार मालकाने वणी पोलीस ठाण्यात तक्रार दाखल केली असून पोलिसाने राजूर कॉलरी येथील 3 महिला, वरोरा येथील 1 महिला व अनोळखी 4 असे एकूण 8 जणांवर भारतीय न्याय संहिता (बी एन एस), 2023 चे कलम 189(2), 191(2), 190, 118(1), 115(2), 296, 351(2), 351(3) नुसार गुन्हा दाखल केला आहे. पुढील तपास पोलीस निरीक्षक गोपाल उंबरकर यांचे मार्गदर्शनात वणी पोलीस करीत आहे.
