वणी टाईम्स न्युज : अवैध रेती तस्करी विरुध्द महसूल व पोलीस कारवाईला वेग आला आहे. पैनगंगा नदीवरून अवैधरीत्या रेतीची चोरटी वाहतूक होत असल्याची माहिती शिरपूर पोलिसांना मिळाली. खात्रीलायक माहितीवरुन ठाणेदार माधव शिंदे यांनी एका पोलीस कर्मचाऱ्यासह दुचाकीवर कळमणा गाव गाठले. गुरुवार 10 एप्रिल रोजी दुपारच्या वेळी पैनगंगा नदीकडून रेती भरून येणाऱ्या लाल रंगाच्या विना क्रमांकाचा ट्रॅक्टर ज्याच्यावर ‘मुसळे पाटील’असे लिहिलेले होते, त्याला ठाणेदार शिंदे यांनी थांबविले.
ठाणेदार माधव शिंदे यांनी ट्रॅक्टर चालकास नाव पत्ता विचारले असता त्यांनी आपले नाव अनिकेत संजय मुसळे (21) रा. कळमणा असे सांगितले. ट्रॅक्टरच्या ट्रॉलीमध्ये भरलेल्या रेतीची रॉयल्टी व वाहतूक परवाना बाबत विचारणा केली असता चालकाकडे कोणतेही दस्तावेज मिळाले नाही. त्यामुळे सदर रेती अवैधरीत्या उत्खनन व वाहतूक होत असल्याची खात्री पटल्याने ठाणेदार शिंदे यांनी पेट्रोलिंगवर असलेले पीएसआय रावसाहेब बुधवंत व पोलीस पथक बोलावून ट्रॅक्टर व ट्रॉली किंमत 5 लाख तसेच रेती 1 ब्रास किंमत 5 हजार असे एकूण 5 लाख 5 हजाराचा मुद्देमाल जप्त केला.
शिरपूर पोलिसांनी ट्रॅक्टर चालका विरुद्ध गुन्हा नोंद करुन दंडात्मक कार्यवाही करिता तहसीलदार वणी यांना अहवाल पाठविला आहे. तसेच कळमणा गावात वडाच्या झाडाखाली अवैधरीत्या साठा करून ठेवलेली तब्बल 2 ते 3 ब्रास रेतीबाबत महसूल विभागाला सूचना देऊन ती रेती जप्तीची कार्यवाही करण्यात आली.
