वणी टाईम्स न्युज : यवतमाळ जिल्ह्यात वाढत असलेल्या आंतरराज्यीय अवैध गुटखा तस्करी विरोधात स्थानिक गुन्हे शाखा (LCB) यवतमाळने धडक कारवाई करत मोठा पर्दाफाश केला आहे. तेलंगणा राज्यातून महाराष्ट्रात प्रतिबंधित सुगंधित पानमसाला व तंबाखूची वाहतूक करणाऱ्या आयशर वाहनासह दोघा आरोपींना ताब्यात घेण्यात आले असून तब्बल ६५ लाख ९८ हजार रुपयांचा मुद्देमाल जप्त करण्यात आला आहे.
तेलंगणा राज्यातून राष्ट्रीय महामार्ग क्रमांक ४४ मार्गे पांढरकवडाकडे एका आयशर वाहनातून बंदी असलेला पानमसाला व तंबाखूची वाहतूक होत असल्याची खात्रीशीर माहिती एलसीबी पथकाला प्राप्त झाली. माहिती मिळताच कोणताही विलंब न करता LCB पथकाने दिनांक 27 डिसेंबर रोजी दोन पंचांसह महामार्गावरील ढोकी गावापुढे सापळा रचून संशयित आयशर वाहन क्रमांक (UP94-AT2305) थांबवून तपास केला.
पथकाने वाहनाची झडती घेतली असता सागर पान मसाला व SR-1 Sended Tobacco असे एकूण १८० पोते आढळून आली. यामध्ये सुगंधित पानमसाला व तंबाखूची किंमत ४५,९२,००० रुपये, एक मोबाईल फोन ६,००० रुपये, तसेच आयशर वाहनाची अंदाजे किंमत २०,००,००० रुपये असा एकूण ६५,९८,००० रुपयांचा मुद्देमाल जप्त करण्यात आला. या प्रकरणी वाहनचालक मोहन सियाराम यादव (२), रा. पिचोड, जि. शिवपुरी, मध्यप्रदेश व क्लिनर बुध्दा बाबुसिंग परीयार (३५), रा. अमोला, ता. घसारी, जि. शिवपुरी, मध्यप्रदेश यांना ताब्यात घेण्यात आले आहे.
सदर यशस्वी कारवाई पोलीस अधीक्षक कुमार चिता, अप्पर पोलीस अधीक्षक अशोक थोरात यांच्या मार्गदर्शनाखाली पोलीस निरीक्षक सतीश चव्हाण, सहाय्यक पोलीस निरीक्षक दत्ता पेंडकर, पोउपनि धनराज हाके, गजानन राजामलू यांच्यासह स्थानिक गुन्हे शाखेच्या अधिकारी व अंमलदारांनी पार पाडली. सदर प्रकरणाचा पुढील तपास पोलीस स्टेशन पांढरकवडा येथे सुरू आहे.
