वणी टाईम्स न्युज : येथील घुग्गुस मार्गावर मांडवकर बार मागे, गौरी लेआउट येथे 18 ऑगस्ट रोजी झालेल्या खुनाचा अखेर नऊ दिवसानंतर उलगडा करण्यात पोलिसांना यश आला आहे. यवतमाळ स्थानिक गुन्हे शाखेच्या पथकाने तपासाची चक्रे फिरवून आरोपी युवकाला जेरबंद केले आहे. आशिष संजय कटोते (21), रा. भद्रावती, ह. मु. नवीन वागदरा, वणी असे मारेकरी युवकाचे नाव आहे.
काय आहे घटना ?
दिनांक 18 ऑगस्ट रोजी गौरी लेआउट मध्ये खुल्या जागेवर भंगार गोळा करणाऱ्या 56 वर्षीय देवराव दत्तु गुजेकर या वृद्धाचा मृतदेह नग्नावस्थेत आढळला होता. मृतदेहाची ओळख त्यांची भाची शालु लक्ष्कर हिने पटवून दिल्यानंतर वणी पोलीस ठाण्यात अज्ञात आरोपीविरुद्ध खुनाचा गुन्हा नोंदविण्यात आला होता. वणी पोलिसांनी वेगवेगळया दृष्टिकोनातून तपास करूनही मारेकरी बाबत काही माहिती हाती लागत नव्हती.
शेवटी जिल्हा पोलीस अधीक्षक यांचे आदेशाने गुन्ह्याचा छडा लावण्यासाठी स्थानिक गुन्हे शाखा, यवतमाळची पथके वणी येथे कॅम्प करून तपासात गुंतली होती. मात्र तांत्रिक तपास व रेकॉर्डवरील आरोपींची पडताळणी करूनही ठोस धागा लागत नव्हता. दरम्यान, गुप्त बातमीदाराकडून मिळालेल्या माहितीनुसार पोलिसांनी संशयित पल्सर मोटारसायकल (MH12 PX 4611) व चालकाला लालगुडा चौकात सापळा लावून पकडले.
खुनामागचे कारण..!
चौकशीत आरोपी आशिष कटोते याने कबुली दिली की, तो भद्रावती येथील रहिवासी असून लालगुडा येथे आजीजवळ राहून गवंडी काम करतो. घटनेच्या काही दिवस आधी तो दारूच्या नशेत लालगुडा चौक बस शेडमध्ये झोपून असताना त्याच्या खिशातील 10 हजार रुपये व मोबाईल चोरीला गेले होते. त्याला समजले की ही चोरी भंगार वेचणाऱ्या देवराव गुंजेकर यांनी केली होती. या संशयातूनच कटोते याने 18 ऑगस्ट रोजी रात्री गुंजेकर यांना मोटारसायकलवर बसवून दारू पिण्यासाठी घुग्गुस मार्गावर गौरी लेआऊट मध्ये नेले. त्याठिकाणी त्यांनी चोरलेले पैसे व मोबाईल बाबत गुंजेकर यास विचारणा केली असता त्यांनी मौन बाळगल्याने संतापलेल्या आरोपीने त्यांच्यावर लाथाबुक्यांचा व दगडाने प्राणघातक हल्ला करून खून केल्याची कबुली दिली.
पोलिसांचे शर्थीचे प्रयत्न
आरोपीला अटक करून पुढील तपास वणी पोलीस ठाण्याचे पोलिस निरीक्षक करत आहेत. ही कारवाई पोलीस अधीक्षक कुमार चिंता, अपर पोलीस अधीक्षक अशोक थोरात यांच्या मार्गदर्शनाखाली करण्यात आली. यामध्ये पो.नि. सतिश चवरे (स्थानीक गुन्हे शाखा), पो.नि. गोपाल उंबरकर (पो.स्टे. वणी), स.पो.नि. दत्ता पेंडकर, पोउपनि गजानन राजमुल्लु, पोउपनि धनराज हाके, तसेच पोलीस अंमलदार सैयद साजीद, सुनिल खंडागळे, रुपेश पाली, सुधीर पांडे, निलेश निमकर, सुधीर पिदुरकर, रजनिकांत मडावी, सलमान शेख, सुनिल पैठणे, आकाश सुर्यवंशी, नरेश राउत, सतिष फुके, पठाण, पोउपनि धीरज गुन्हाणे आणि डिबी पथक वणी यांनी मोलाचा सहभाग नोंदविला.
