📰 नगराध्यक्ष महोदया… शहरात चाललंय तरी काय ?

वणी टाईम्स न्यूज | वणी शहरात सध्या दोनच गोष्टींचा अक्षरशः धडाका सुरू आहे—लग्नसराईची धामधूम आणि बांधकामांचा सुळसुळाट. मात्र या दोन्हीमुळे सर्वसामान्य नागरिकांचे जगणेच कठीण झाले आहे. रस्त्यावर उभारलेले लग्नमंडप, बेधडक पार्किंग आणि रस्त्यांवर टाकलेले रेती-गिट्टीचे ढिगारे यामुळे वाहतूक व्यवस्थेचा पूर्णपणे बोजवारा उडाला आहे. परिस्थिती इतकी बिघडली आहे की, शहरात कायद्याचे अस्तित्व आहे की नाही, असा थेट सवाल नागरिकांकडून उपस्थित केला जात आहे.

🚧 परवानगीशिवाय सुरू ‘मोकळं राज्य’

नगर परिषद हद्दीत सध्या एक धोकादायक ट्रेंड दिसून येतोय—“परवानगी नको, मनमानी चालेल”. बांधकाम असो, बोरवेल असो, सिमेंट रस्ता फोडून पाईपलाइन टाकणे असो किंवा कार्यक्रमासाठी मंडप उभारणे—कुठल्याही कामासाठी नगर परिषदेची परवानगी घेतली जात नाही. नियम फक्त कागदावरच राहिले आहेत, आणि अंमलबजावणी पूर्णपणे गायब झाल्याचे चित्र स्पष्ट दिसते.

🎪 रस्ते झाले ‘लग्नमंडप’

शहरातील मुख्य रस्ते आता वाहतुकीसाठी नसून, लग्नसोहळ्यांसाठी राखीव झाल्यासारखी परिस्थिती आहे. 5 ते 7 दिवसांपर्यंत रस्त्याच्या मध्यभागी मंडप उभारले जातात, आणि प्रशासनाकडून कोणतीही कारवाई होत नाही. यात भर म्हणजे अनेक मंगल कार्यालयांकडे पार्किंगची सोय नसल्याने, वाहनांची गर्दी थेट रस्त्यावरच होते आणि वाहतूक कोंडी अधिकच वाढते.

🚛 रस्त्यांवरच वाहनांचे ‘कबाडखाने’

चिखलगाव ते वरोरा रोड रेल्वे क्रॉसिंग आणि साई मंदिर ते रेल्वे क्रॉसिंग या नव्याने तयार झालेल्या चारपदरी सिमेंट रस्त्यांवरही परिस्थिती वेगळी नाही. रस्त्याच्या कडेला जुनाट, भंगार वाहने, ट्रक, बस आणि मशीनरी कायमस्वरूपी उभी असतात. परिणामी, चारपदरी रस्ता असूनही नागरिकांना एकाच लेनमध्ये जीव मुठीत धरून प्रवास करावा लागतो.अशा बेकायदेशीर वाहनांवर जप्तीची मोहीम राबवणे अत्यावश्यक असतानाही प्रशासन गप्प आहे.

⚠️ बांधकाम साहित्यामुळे अपघातांचा धोका

शहरात मोठ्या प्रमाणावर सुरू असलेल्या बांधकामांमुळे रेती, गिट्टी, सिमेंट रस्त्यावरच टाकले जात आहे. यामुळे अनेक वेळा दुचाकी घसरून अपघात घडत आहेत. नागरिकांच्या सुरक्षिततेचा प्रश्न निर्माण झाला असतानाही नगर परिषद मात्र डोळेझाक करत असल्याचे स्पष्ट दिसते.

📊 100 दिवसांचा कृती आराखडा—फक्त कागदावरच ?

नगराध्यक्ष महोदया, आपण पदभार स्वीकारताना 100 दिवसांचा कृती आराखडा जाहीर केला होता. मात्र 105 दिवस उलटूनही त्या आराखड्यातील एकही ठोस कृती प्रत्यक्षात दिसत नाही.

👉 त्यामुळे आता नागरिकांमध्ये प्रश्न अधिक तीव्र झाला आहे—

हा कृती आराखडा फक्त निवडणुकीपुरताच होता का?

🔴 नागरिकांचा थेट सवाल

शहरातील वाढत्या अराजकतेकडे पाहता, प्रशासनाची भूमिका संशयास्पद ठरत आहे. नियम सर्वांसाठी सारखे असतात की फक्त सामान्य नागरिकांसाठीच? अतिक्रमण, वाहतूक कोंडी आणि बेकायदेशीर कामांवर तात्काळ कारवाई होणार का?

✍️ (वणी टाईम्स – जनतेचा आवाज)