वणी टाईम्स न्युज : रस्त्यावर उभ्या असलेल्या ट्रकच्या पाठीमागून भरधाव दुचाकीने धडक दिली. वणी घुग्गुस चंद्रपूर महामार्गावर पुनवट गावाजवळ शनिवार 12 ऑक्टोबर रोजी रात्री 11 वाजता घडलेल्या या अपघातात दुचाकीस्वार जागीच मरण पावला. उमाकांत केशव येरगुडे (45) रा. तुलसी नगर चंद्रपूर असे मृतकाचे नाव आहे. घटने बाबत मृतक उमाकांत याचे सासरे मनोहर शामराव करडभुजे, रा. शेलू यांनी शिरपूर पोलीस ठाण्यात तक्रार दाखल केली.
तक्रारीनुसार उमाकांत येरगुडे आपल्या ड्रीम युगा मोटरसायकल क्रमांक MH34 AW 4620 वर शनिवारी रात्री वणी येथून चंद्रपूर येथे जात होते. दरम्यान घुग्गुस मार्गावर पूनवट गाव हद्दीत ठाकरे यांचे शेताजवल रस्त्यावर उभा असलेला ट्रक क्रमांक RJ21 GD 5848 हा अंधारात दिसून न पडल्याने मोटरसायकल ट्रकवर पाठीमागून आदळली. या अपघातात उमाकांत येरगुडे यांच्या डोक्याला गंभीर मार लागल्यामुळे तो जागीच मरण पावला.
ट्रक चालकाने सुरक्षेची कोणतीही उपाय योजना न करता अपघात होईल अशा स्थितीत ट्रक रस्त्यावर उभा केल्यामुळे जावयाच्या मृत्यूस कारणीभूत असल्याची तक्रार फिर्यादी यांनी दिली. शिरपूर पोलिसांनी ट्रक क्रमांक RJ21 GD 5848 च्या चालकाविरुद्ध कलम 106(1) व 285 नुसार गुन्हा दाखल केला आहे.
