वणी टाईम्स न्युज : वणी तालुक्यातील भालर व घोंसा परिसरात अज्ञात चोरट्यांनी दोन वेगवेगळ्या ठिकाणाहून दुचाकी वाहनांची चोरी केल्याच्या घटना उघडकीस आल्या आहेत. दोन्ही प्रकरणांमध्ये संबंधित पोलीस ठाण्यांमध्ये गुन्हे नोंदवून तपास सुरू करण्यात आला आहे.
पहिल्या घटनेत भालर येथील रॉकवेल मिनरल्स कंपनीच्या पार्किंग मधून चोरट्यांनी स्प्लेंडर मोटरसायकल लंपास केली. फिर्यादी स्वप्निल अशोक टेकाम (27) रा. गणेशपूर, वणी हा रॉकवेल मिनरल्स कंपनीत इलेक्ट्रिशियन म्हणून कार्यरत आहे. दिनांक 28 मे रोजी नाईट ड्युटी असल्याने रात्री 10 वाजता त्यांनी कंपनीच्या पार्किंगमध्ये आपली स्प्लेंडर प्लस मोटरसायकल क्रमांक MH29 -BW6382 उभी करून कंपनीत गेला होता. दुसऱ्या दिवशी सकाळी 6 वाजता ड्यूटी संपल्यानंतर पार्किंग मध्ये गेला असता त्याची मोटरसायकल पार्किंगमध्ये आढळली नाही. शोधाशोध करूनही गाडी न सापडल्यामुळे अज्ञात व्यक्तीने त्याची स्प्लेंडर प्लस मोटरसायकल किंमत 40 हजार, चोरी केल्याची खात्री झाल्याने त्यांनी वणी पोलिसांत तक्रार दाखल केली.
दुसरी घटना मुकुटबन पोलीस स्टेशन हद्दीत घोंसा गावात घडली. फिर्यादी प्रकाश लक्ष्मण गोहोणे रा. घोंसा हे आपली बजाज पल्सर दुचाकीवर बसून गावातील बस स्टँड जवळ आले असता, त्यांच्या मोबाईल वर कॉल आला. त्यामुळे त्यांनी मोटरसायकल बाजूला ठेवून गाडीची चाबी हाताळत मोबाईलवर बोलता बोलता दुचाकी पासून दूर गेले. काही वेळाने ते परत आले असता त्याची बजाज पल्सर मोटरसायकल क्रमांक MH-29 CH 9359 ही ठेवलेल्या ठिकाणी दिसून पडली नाही. त्यामुळे त्यांनी वणी पोलीस ठाण्यात त्यांची दुचाकी किंमत 90 हजार अज्ञात चोरट्याने चोरून नेल्याची तक्रार दाखल केली.
दोन्ही प्रकरणांमध्ये अज्ञात आरोपीविरुद्ध गुन्हे दाखल करण्यात आले असून, वणी व मुकुटबन पोलिसांकडून तपास सुरू आहे. दुचाकी चोरीचे प्रमाण वाढत असल्याने वाहनधारकांनी विशेष दक्षता घेण्याचे आवाहन पोलिसांकडून करण्यात आले आहे.
