वणी टाईम्स न्युज : आदिवासी बहुल झरीजामणी तालुक्यातील महाकाली देवस्थान येथे आयोजित नवरात्र उत्सवाच्या पार्श्वभूमीवर दि. 30 सप्टेंबर 2025 रोजी महाराष्ट्र शासनाचे स्वच्छता दूत राष्ट्रसंत साईनाथ महाराज वसमतकर (आनंद दत्त धाम आश्रम, माहूरगड) यांनी शासकीय दौऱ्याला सुरुवात केली. हा दौरा झरी येथील मॅकलवार इंग्लिश मिडीयम स्कूल येथे आयोजित स्वच्छता जनजागृती कार्यक्रमाने प्रारंभ झाला.
नगरपंचायत कार्यालयात महाकाली देवस्थानचे अध्यक्ष प्रकाश मॅकलवार यांच्या पुढाकाराने कार्यक्रम पार पडला. नगरपंचायतचे मुख्याधिकारी गावंडे यांच्या अध्यक्षतेखाली मान्यवरांनी आदिवासी वीर बिरसा मुंडा यांच्या प्रतिमेचे पूजन करून स्वच्छता अभियानाची सुरूवात केली. यानंतर झरी ग्रामीण रुग्णालयात डॉ. नेहा डोख यांनी महाराजांच्या रॅलीचे स्वागत केले. पुढील कार्यक्रमानुसार दुपारी 3 वाजता आयटीआय कॉलेज, झरी येथे साईनाथ महाराजांचा शासकीय दौरा झाला.
महाराष्ट्र शासनाच्या व्यवसाय शिक्षण व प्रशिक्षण संचालनालयामार्फत साईनाथ महाराजांची 28 सप्टेंबर 2025 रोजी स्वच्छता दूतपदी नियुक्ती करण्यात आली असून त्यांच्या पहिल्या अधिकृत भेटीसाठी झरीची निवड महाकाली देवस्थानचे अध्यक्ष प्रकाश मॅकलवार यांच्या प्रयत्नांतून घडून आली. तसेच महाराष्ट्रातील पहिला आयटीआय कॉलेजला भेट देण्याचा मान झरीला मिळाला.
आयटीआय कॉलेजमध्ये महाराजांनी विद्यार्थ्यांना व्यवसाय शिक्षणासोबत स्वच्छतेचे महत्त्व पटवून दिले. या कार्यक्रमास अध्यक्ष म्हणून पंकज डांगे सर उपस्थित होते. प्रमुख पाहुणे म्हणून प्रकाश मॅकलवार, नांदेड येथील कार्रेवाड साहेब व बद्दीवर साहेब यांनीही हजेरी लावली. संपूर्ण कार्यक्रमाचे सुत्र संचालन आजाद उदकवार यांनी केले तर आभार प्रदर्शन गोरे सर यांनी मानले. कार्यक्रमाचा समारोप महाकाली देवस्थान येथे करण्यात आला.
