वणी टाईम्स न्युज : तालुक्यातील वणी नॉर्थ आणि वणी क्षेत्र अंतर्गत गावांमध्ये वेकोलिच्या कोळसा खाणींमुळे अनेक समस्या उद्भवलेल्या आहेत. या सर्व समस्यावर त्वरित उपाययोजना करण्याची सूचना खासदार प्रतिभा धानोरकर यांनी वेकोलि अधिकाऱ्यांना दिल्या आहेत. 12 सप्टेंबर रोजी भालर आणि ऊर्जापुर ताडाळी येथील वेकोलि मुख्य महाप्रबंधक कार्यालयात झालेल्या बैठकीत त्यांनी वेकोलि क्षेत्रातील गावांमधील समस्यांचा आढावा घेतला.
यावेळी काँग्रेसचे जिल्हा सरचिटणीस संजय खाडे यांनी वेकोलिच्या घोन्सा कोळसा खाणीसाठी कुंभारखनी येथील शेतजमिनी संपादित करण्यात आल्या आहेत. मात्र, सिंचित जमिनी असतानाही विस्थापित शेतकऱ्यांना कोरडवाहू जमिनीच्या दराने भरपाई देण्यात येत आहे. हे अन्यायकारक असून, वेकोलिच्या नियमांनुसार सिंचित जमिनींच्या दराने भरपाई देण्याची मागणी वेकोली अधिकाऱ्यांना केली. प्रकल्पग्रस्त शेतकऱ्यांना तातडीने वेकोलित रोजगार देऊन, त्यांना त्यांच्या जवळच्या खाणींमध्येच नोकरी मिळावी, अशी मागणीही करण्यात आली.
वेकोलिने घोन्सा गावातील मुख्य रस्ता बांधुन देण्याचे आश्वासन काही वर्षापूर्वी ग्रामस्थांना दिले होते. परंतु ते अद्याप पूर्ण केले नाही., त्यामुळे या रस्त्याचे बांधकाम करून देण्यात यावे. खाण प्रभावित उकणी, पिंपळगाव, जुनाडा, बोरगाव, अहेरी, कोलेरा-पिंपरी, निलजई, बेलोरा, मुंगोली, कोलगाव या गावातील उर्वरित शेतजमिनीचे भू संपादन लवकरात लवकर करावे. उकणी, पिंपळगाव, कोलेरा-पिंपरी या गावांच्या पुनर्वसनाचा प्रश्न तात्काळ मार्गी लावावा. स्थानिक बेरोजगार युवकांना वेकोलिमध्ये कंत्राटी पद्धतीने काम करणाऱ्या खासगी कंपन्यांमध्ये नोकरीत प्राधान्य द्यावे. ब्राह्मणी (निळापूर) येथील कोलवॉशरीमुळे होणाऱ्या धुळीमुळे शेतकऱ्यांच्या पिकांचे नुकसान होत असल्यामुळे त्यांना योग्य मोबदला मिळावा, असा आग्रह संजय खाडे यांनी धरला.
कोळशाची ओव्हरलोड वाहतूक थांबावी
डब्ल्यूसीएल च्या कोळसा खाणीमधून होणारी ओव्हरलोड वाहतुकीमुळे रस्त्यांची चाळणी झाली आहे. त्यामुळे अधिकाऱ्यांनी ओव्हरलोड वाहतुकीवर आळा घालावं.निळापूर येथील गुंडा नाल्यावर पूल बांधावा, लालगुडा ते उकणी रस्त्याची दुरुस्ती, वणी ते प्रगती नगर कॉलनीपर्यंत रस्त्याचे डांबरीकरण किंवा सिमेंटिकरण करावे, चारगाव चौकी- शिंदोला-कोरपना रस्त्यावरील ओव्हरलोड वाहतूक थांबवून त्या रस्त्याचे सिमेंटिकरण करावे आणि शिंदोला-येनक-येनाडी-मंगोली रस्त्याच्या दुरुस्तीचे काम तात्काळ सुरू करावे अशी मागणीही यावेळी करण्यात आली.
संजय खाडे यांचा आंदोलनाचा इशारा
वणी आणि वणी नॉर्थ क्षेत्रातील समस्यांबाबत अनेक वेळा निवेदन दिल्यानंतरही वेकोलि प्रशासनाने त्यांची योग्य ती दखल घेतली नाही. त्यामुळे नागरिकांमध्ये नाराजी पसरली आहे. या समस्यांकडे वेकोलिने त्वरित लक्ष न दिल्यास गावकऱ्यांना सोबत घेऊन तीव्र आंदोलन छेडले जाईल, असा इशारा संजय खाडे यांनी दिला आहे. यावेळी डॉ. शंकर वऱ्हाटे, तेजराज बोढे, प्रमोद वासेकर, संजय सपाट, विलास डाहुले, मंगेश मोहुर्ले, विजय जिवने, रामटेके सर, भिमराव चिडे, फरिद शेख, प्रमोद पोटे इतर पदाधिकारी व गावकरी मोठ्या संख्येने उपस्थित होते.
