वणी टाईम्स न्युज : शहरालगत असलेल्या एका गावातून अल्पवयीन विद्यार्थिनीला फुस लावून पळवून नेल्याची घटना समोर आली आहे. मुलीच्या आईने दिलेल्या तक्रारीवरून वणी पोलीस स्टेशनमध्ये अज्ञात व्यक्ती विरुद्ध अपहरणाचा गुन्हा दाखल करण्यात आला आहे.
बेपत्ता मुलीच्या आईने दिलेल्या तक्रारीनुसार तिला दोन मुली असून 16 वर्षाची लहान मुलगी शहरातील एका महाविद्यालयात 11 व्या वर्गात शिक्षण घेत आहे. 29 जुलै रोजी रात्री 8 वाजता सुमारास मुलगी तिच्या आईला मी बाहेर फिरून येतो असे सांगून घराबाहेर निघाली. मात्र रात्री उशिरा पर्यंत ती परत घरी आलीच नाही.
गावात तसेच नातेवाईकांकडे शोध घेऊनही ती मिळून आली नाही. शेवटी फिर्यादी आईने वणी पोलीस ठाणे गाठून कुणीतरी इसमाने तिच्या अल्पवयीन मुलीच्या अज्ञानतेचा फायदा घेऊन पळवून नेल्याची तक्रार नोंदविली. पोलिसांनी अज्ञात आरोपीविरुद्ध कलम 137(2) भा.न्या. सं. नुसार गुन्हा दाखल केला.
