वणी टाईम्स न्युज : शहरातील काही ठराविक हॉटेल्स व लॉजमध्ये दिवसाढवळ्या व रात्री बेरात्री खुलेआम देहव्यवसाय सुरू असल्याचा खळबळजनक प्रकार समोर आला आहे. स्थानिक पोलिसांना वेळोवेळी माहिती देऊनही या संदर्भात ठोस कारवाई होत नसल्याने नागरिकांमध्ये संतापाची लाट आहे. या अवैध धंद्याला डिजिटल स्वरूप प्राप्त झाले असून, व्हॉट्सॲप, मेसेंजर यांसारख्या अॅप्सद्वारे ग्राहकांपर्यंत मुलींचे फोटो पोहोचवले जात आहेत.
ऑनलाईन प्लॅटफॉर्मद्वारे रॅकेटचं संचालन
या रॅकेटमध्ये काही ठराविक दलाल सक्रीय असून, ते मोबाईल अॅप्सच्या माध्यमातून ग्राहकांशी थेट संपर्क साधतात. ग्राहकाच्या मागणीनुसार मुलींचे फोटो, दररोजचे “रेट” आणि “सेवा” याबाबत माहिती पाठवली जाते. व्यवहार निश्चित झाल्यावर ग्राहकाला विशिष्ट हॉटेल/लॉज मध्ये बोलावून मुलींची व्यवस्था केली जाते. विशेष म्हणजे, या हॉटेल्स आणि लॉज चालकांनाही या व्यवसायाबद्दल माहिती असून ग्राहकांचे ओळखपत्र न घेता ते परस्पर सहमतीने जागा उपलब्ध करून देत असल्याची माहिती सूत्रांकडून समोर आली आहे.
महाविद्यालयीन व शाळकरी विद्यार्थीही अडकले
या रॅकेटमध्ये केवळ श्रीमंत, व्यावसायिक व नोकरदार शौकीनच नव्हे तर कॉलेज तसेच काही शाळकरी विद्यार्थीही अडकले आहेत. समाजमाध्यमांवरील वाढती आकर्षणं, हौशी जीवनशैली व फास्ट मनीची लालसा यामुळे तरुण पिढी या विळख्यात अडकत आहे. हे अत्यंत चिंताजनक असून अनेक पालकांनाही आपल्या मुलांचा सहभाग असल्याची कल्पनाच नाही.
बाहेरील राज्यांतून कॉलगर्लची मागणी
ग्राहकांच्या विशेष मागणीनुसार नागपूर, पुणे, मुंबई, तसेच छत्तीसगड, मध्यप्रदेशातील मुलींनाही येथे बोलावले जाते. काही केसेसमध्ये कॉलगर्लना रेल्वे स्थानक अथवा हायवेवरून उचलून थेट हॉटेलमध्ये नेण्याची यंत्रणा उभी करण्यात आली आहे. यामागे एक संगठित टोळी कार्यरत असून, तिचे अनेक गुन्हेगारी कनेक्शन असण्याची शक्यता नाकारता येत नाही.
ग्रामीण भागातून आलेल्या व अल्पवयीन मुलींचा वापर
शहरात शिक्षण घेण्यासाठी आलेल्या अनेक गरीब व हलाखीच्या परिस्थितीत असलेल्या मुलींना जाळ्यात अडकवून त्यांच्यावर मानसिक दबाव टाकून, आर्थिक प्रलोभने दाखवून देह व्यवसायासाठी त्यांचा वापर केला जात असल्याची विश्वसनीय माहिती समोर आली आहे. तसेच या व्यवसायात अल्पवयीन मुलींची मागणी जास्त असल्याने संबंधित दलाल बाहेर राज्यातून अल्पवयीन मुलीचा पुरवठा करत असल्याचेही सांगण्यात येते. यातूनच काही मुलींची आयुष्यभरासाठी मानसिक व सामाजिक हानी होत असल्याची उदाहरणंही आहेत. हे अत्यंत गंभीर असून मुलींच्या बालपणावर गदा आणणाऱ्या या प्रकरणात बाल संरक्षण आयोग, महिला आयोग, तसेच मानवाधिकार संस्था यांचा तातडीने हस्तक्षेप आवश्यक आहे.
कायद्याची आड घेऊन पोलीस प्रशासनाचे दुर्लक्ष ?
स्थानिक पोलिसांना याबाबत अनेकदा तक्रारी करण्यात आल्या असून, सज्ञान (18 वर्षांवरील) मुलं मुली बाबत सुप्रीम कोर्टाचे दिशानिर्देश असल्याचा कारण पुढे करून सोयीस्कररित्या कारवाई टाळली जाते. काहीवेळा छापेही टाकण्यात आले. मात्र, सार्वजनिक ठिकाणी असभ्य वर्तन केल्याची कलम लावून त्यांना सोडण्यात आले.
संपादकीय मत:
शहरात सुरू असलेल्या या अवैध देहव्यवसायामुळे सामाजिक आरोग्य धोक्यात आले आहे. युवापिढीची नैतिक अधोगती होत आहे आणि महिलांवर अत्याचाराचा धोका वाढतो आहे. प्रशासनाने याकडे गांभीर्याने लक्ष देणे गरजेचे आहे. सखोल चौकशी करून या रॅकेटमागील मास्टरमाइंडना अटक करणे आणि हॉटेल व लॉजवर कायमस्वरूपी नजर ठेवणे ही काळाची गरज आहे.
[वणी टाइम्स न्यूज – आपली खरी बातमी, शहराच्या हितासाठी]
तुमच्याजवळ अशा प्रकारच्या घटना असतील तर आमच्याशी संपर्क साधा. तुमची ओळख गुप्त ठेवण्यात येईल.
