माणुसकीला काळीमा! सिकलसेल पीडित चिमुरडीवर अत्याचार; नराधमाने लादले मातृत्व

वणी टाईम्स न्यूज: माणुसकीला लाजवेल अशी एक संतापजनक घटना मारेगाव पोलीस स्टेशनच्या हद्दीत उघडकीस आली आहे. एका सिकलसेल पीडित अल्पवयीन मुलीच्या असहायतेचा फायदा घेत, गावातीलच एका विवाहित नराधमाने तिच्यावर वारंवार अत्याचार केले आणि तिला गरोदर केले. या घटनेमुळे संपूर्ण परिसरात संतापाची लाट उसळली आहे.

विश्वासाला तडा: ओळखीचा फायदा घेत जाळ्यात ओढले

मिळालेल्या माहितीनुसार, आरोपी किशोर विक्रम आत्राम (२४) हा विवाहित असून त्याचे पीडितेच्या कुटुंबाशी घरगुती संबंध होते. याच ओळखीचा फायदा घेत त्याने घरात कुणीही नसताना अल्पवयीन मुलीला प्रेमाच्या जाळ्यात ओढले. मागील एका वर्षापासून त्याने मुलीवर विविध ठिकाणी अनेकदा अत्याचार केले. पीडितेच्या निरागसतेचा फायदा घेत त्याने हे कृत्य सुरूच ठेवले.

आजाराचे सावट आणि धक्कादायक वास्तव

पीडित मुलगी सिकलसेल आजाराने ग्रस्त असल्याने तिची प्रकृती अनेकदा खालावलेली असते. मागील तीन महिन्यांपासून तिला मासिक पाळी आली नव्हती, मात्र रक्ताच्या कमतरतेमुळे असे होत असावे, असा कुटुंबाचा समज होता. संशय आल्याने ६ जानेवारी रोजी आईने तिला वणीतील तज्ज्ञ डॉक्टरांकडे नेले. तिथे झालेल्या सोनोग्राफी रिपोर्टमध्ये मुलगी अडीच महिन्यांची गरोदर असल्याचे समोर आले आणि कुटुंबाच्या पायाखालची जमीनच सरकली.

पोलीस कारवाई आणि आरोपीचा शोध

घटनेचे गांभीर्य ओळखून डॉक्टरांनी तत्काळ वणी पोलिसांना कळवले. प्राथमिक तपासानंतर वणी पोलिसांनी प्रकरण मारेगाव पोलिसांकडे वर्ग केले.त्यानंतर मारेगावचे ठाणेदार शाम वानखेडे यांनी महिला पोलीस अधिकाऱ्यासह पीडितेचे बयान नोंदवले. पीडितेचे बयान आणि वैद्यकीय अहवालावरून नराधम आरोपी किशोर आत्राम विरुद्ध भारतीय न्याय संहिता (BNS) कलम ६५(१), ६४(२), ६४(२)(M) आणि पॉक्सो (POCSO) कायद्यांतर्गत गुन्हा नोंदवण्यात आला आहे. गुन्हा दाखल झाल्याची कुणकुण लागताच आरोपी किशोर आत्राम फरार झाला असून, पोलीस पथक त्याच्या मागावर आहे.

संपादकीय मत: आपण कुठे चाललो आहोत?

एकीकडे आपण मुलींच्या सुरक्षिततेच्या गप्पा मारतो, तर दुसरीकडे आजाराने ग्रस्त असलेल्या अल्पवयीन मुलीवर ओळखीच्याच व्यक्तीने अत्याचार करावा, ही बाब समाजासाठी घातक आहे. अशा नराधमांना कठोर शासन होणे हीच पीडितेला खरी न्याय देणारी बाब ठरेल. पालकांनो सावधान! आपल्या मुलांच्या वागण्यातील बदल आणि घरातील येणाऱ्या-जाणाऱ्या व्यक्तींच्या हालचालींवर बारीक लक्ष ठेवा. तुमचा थोडासा सतर्कपणा एका मुलीचे आयुष्य वाचवू शकतो.