वणी टाईम्स न्युज : वणी पोलीस स्टेशन हद्दीतील एका गावातून 14 वर्षीय अल्पवयीन मुलीला दुसऱ्या गावातील युवकाने ऑटो रिक्षात बसवून पळवून नेल्याची घटना समोर आली आहे. दिनांक 9 मे रोजी सायंकाळी 5 वाजता उघडकीस आलेल्या या घटनेबाबत मुलीच्या वडिलांनी आरोपी युवकाविरुद्ध तक्रार नोंदविली आहे. विशेष म्हणजे मुलीला परत आणण्यासाठी वडील व नातेवाईक युवकाचे घरी गेले असता मुलीने परत येण्यास नकार दिला. तसेच बळजबरी केल्यास विष पिऊन आत्महत्या करण्याची धमकी दिली.
फिर्यादी वडील हे गावात पत्नी व 3 मुलीसह मोलमजुरी करून उदरनिर्वाह करीत आहे. दिनाक 9 मे रोजी फिर्यादीची मोठी मुलगी कविता (14) (बदललेले नाव) ही घराबाहेर खेळण्याकरिता गेली तर सायंकाळी पर्यंत परत आली नाही. आईवडिलांनी गावात शोध घेतला असता त्यांची मुलगी एका ऑटोमध्ये बसून गेल्याचे समजले. आणखी शोध घेतला असता मुलीला आरोपी अर्जुन कुळसंगे यांनी पळवून नेऊन त्याच्या बहिणीचे घरी बोटोणी येथे असल्याची माहिती मिळाली.
माहितीवरून फिर्यादी वडील नातेवाईकांना घेऊन मुलीला समजवून परत आणण्यासाठी गेले असता मुलीने त्यांचे सोबत येण्यास नकार दिला. तसेच मी अर्जुन सोबतच राहणार असून बळजबरीने परत नेल्यास विष पिऊन आत्महत्या करण्याची धमकी मुलीने वडीलांना दिली. त्यानंतर आरोपी युवक अर्जुनच्या वडिलांनी तुम्ही जा, मी मुलीची समजूत काढून आणून घालतो असे सांगितल्याने सर्वजण परत घरी आले. परंतु दोन दिवस उलटूनही त्यांनी मुलीला आणून सोडले नाही. त्यामुळे फिर्यादी वडिलांनी वणी पोलीस ठाण्यात तक्रार दिली. तक्रारीवरून पोलिसांनी आरोपी अर्जुन कुळसंगे विरुद्ध कलम 137 (2) नुसार गुन्हा दाखल केला आहे.
