वणी टाईम्स न्युज : बांधकाम सुरु असलेल्या घराकडे पायदळ जात असताना एका अज्ञात वाहनाच्या धडकेत इसमाचा मृत्यू झाला. ही दुर्दैवी घटना गुरुवार दि. 4 जुलै रात्री 9 वाजता सुमारास वणी शहरातील नांदेपेरा मार्गावरील लायन्स शाळेजवळ घडली. ईश्वर किशन गाडगे (50), रा. साधनकर वाडी, चिखलगाव असे मृत व्यक्तीचे नाव आहे.
फिर्यादी तुषार ईश्वर गाडगे (24) यांनी दिलेल्या तक्रारीनुसार नांदेपेरा रोड गुप्ता ले आऊट येथे त्यांच्या घराचे बांधकाम सुरु असून त्यांचे वडील ईश्वर गाडगे हे नियमितपणे बांधकाम पाहणीसाठी जात असते. गुरुवारी रात्री 8.30 वाजता सुमारास जेवण करून ते पायदळ त्या ठिकाणी जात होते. रात्री 9.10 मिनिटांनी फिर्यादी यांच्या वडिलांच्या मोबाईल वरून एका जणांने फोन करून कळविले की, लायन्स शाळेजवळ त्यांचे वडिलांचा अपघात झाले असून त्यांना ग्रामीण रुग्णालयात दाखल केले आहे.
माहिती मिळताच मुलगा तुषार गाडगे हा तात्काळ ग्रामीण रुग्णालयात पोहोचला. मात्र, डॉक्टरांनी तपासणी करून ईश्वर गाडगे यांना मृत घोषित केले. कोणत्यातरी अज्ञात वाहनाने त्यांना जबर धडक दिल्यामुळे त्यांच्या डोक्याला गंभीर दुखापत झाली होती व नाक-कानातून रक्तस्राव होत होता. त्यामुळे त्यांचा मृत्यू झाला. या प्रकरणी फिर्यादी तुषार ईश्वर गाडगे याच्या फिर्यादवरून वणी पोलीस स्टेशनमध्ये अज्ञात वाहनचालक विरुद्ध भारतीय न्याय संहिता 2023 मधील कलम 281, 106(1) सह मोटार वाहन कायदा कलम 134 अंतर्गत गुन्हा नोंदविण्यात आला आहे. पुढील तपास पोलीस उपनिरीक्षक महापुरे हे करीत आहेत.
