वणी टाईम्स न्युज | वणी तालुक्यातील बाळापूर (बोपापूर) येथे सोमवारी दुपारी एक अजब आणि धक्कादायक घटना घडली. अचानक आलेल्या जोरदार वाऱ्यामुळे गच्चीवर गहू जमा करीत असलेली महिला हवेत उडून थेट रस्त्यावर कोसळल्याने गंभीर जखमी झाली.
मिळालेल्या माहितीनुसार, निर्मला गुलाब उपरे (40) हिने सोमवारी सकाळच्या सुमारास घराच्या गच्चीवर गहू वाळण्यासाठी टाकले होते. दुपारी सुमारे 4 वाजताच्या दरम्यान परिसरात सोसाट्याचा वारा सुरू झाला तसेच हलक्या पावसालाही सुरुवात झाली. त्यामुळे गहू भिजू नये म्हणून त्या गच्चीवर गहू जमा करण्यासाठी गेल्या होत्या.
यावेळी अचानक जोरदार वाऱ्याचा झोत आल्याने त्यांचा तोल गेला आणि त्या गच्चीवरून खाली रस्त्यावर कोसळल्या. या दुर्घटनेत त्या गंभीर जखमी झाल्या. घटनेनंतर कुटुंबियांनी तत्काळ त्यांना उपचारासाठी वणी येथील एका खासगी रुग्णालयात दाखल केले. दरम्यान, वाऱ्यामुळे महिला उडून खाली पडल्याच्या या विचित्र दुर्घटनेची गावात मोठी चर्चा सुरू आहे.
