वणी टाईम्स न्युज : चारचाकी वाहनात आलेल्या दरोडेखोरांनी मोबाईल शॉप संचालकाला चाकूचा धाक दाखवून लाखो रुपये लुटून नेल्याची घटना सोमवारी रात्री 9.20 वाजता दरम्यान वसंत गंगा विहार परिसरात घडली. घटनेची माहिती मिळताच पोलीस अधिकाऱ्यांनी वेगाने तपास यंत्रणा कार्यान्वित कर दरोडेखोरांचा पाठलाग सुरू केला आहे.
प्राप्त माहितीनुसार शहरातील नामांकित अंकुश मोबाईल शॉपीचे संचालक अंकुश बोढे तब्बल 6 लाख रुपये बॅगमध्ये घेऊन दुचाकीवर वसंत गंगा विहार स्थित घराकडे जात होते. दरम्यान वसंत गंगा विहार कॉलोनीच्या गेटजवळ त्यांची दुचाकी पोहचली असता मागून एका कार मध्ये आलेल्या तिघांनी त्यांचा रस्ता अडवून बॅग हिसकविला. अंकुश यांनी प्रतिरोध केला असता लुटारूंनी कार मधून चाकू काढून अंकुशच्या पोटावर लावला. तसेच अंकुश बोढे यांच्या गळ्यातील सोन्याची चेन त्यांनी तोडून कार मध्ये बसून पळ काढला.
अचानक घडलेल्या या घटनेमुळे स्तब्ध अंकुश बोढे यांनी तत्काळ आपल्या भावाला सांगितले. त्यानंतर घटनेबाबत पोलिसांना सूचना देण्यात आली. घटनेची गांभीर्यता ओळखून उप विभागीय पोलीस अधिकारी गणेश कींद्रे व ठाणेदार अनिल बेहराणी यांनी तत्काळ सर्व रस्त्यावर नाकाबंदी केली. तसेच वरोरा, मारेगाव, चंद्रपूर पोलिसांना सूचना दिली. पोलीस पथकासह उप विभागीय पोलीस अधिकारी गणेश किंद्रे स्वतः लुटारुंच्या शोधात निघाले आहे.
