जितेंद्र कोठारी, वणी : लोककला, नाट्य, साहित्य आणि समाजप्रबोधनाच्या क्षेत्रात आपल्या कार्याचा ठसा उमटविणारे वणी येथील प्रख्यात लोककलावंत डॉ. दिलीप अलोणे यांची विशेष मुलाखत येत्या शुक्रवारी दुपारी १२ वाजता सह्याद्री वाहिनी वर प्रसारित होणार आहे. “नाट्य वेडा लोकशिक्षक” या शीर्षकाखाली सादर होणारा हा विशेष कार्यक्रम कला, संस्कृती आणि रंगभूमी प्रेमींसाठी प्रेरणादायी ठरणार आहे.
बहुआयामी व्यक्तिमत्त्व लाभलेल्या डॉ. दिलीप अलोणे यांची ही प्रदीर्घ मुलाखत ख्यातनाम लेखक, विचारवंत व सूत्रसंचालक डॉ. विवेक अलोनी यांनी घेतली आहे. त्यांच्या जीवनातील विविध पैलूंना स्पर्श करणारी ही मुलाखत अत्यंत अभ्यासपूर्ण आणि रसपूर्ण पद्धतीने सादर करण्यात आली आहे. या कार्यक्रमाच्या निर्माती नागपूर दूरदर्शनच्या मीनल पाठराखे आहेत.
डॉ. दिलीप अलोणे हे केवळ लोककलावंत नसून प्रयोगशील शेतकरी, विद्यार्थ्यांचे लाडके शिक्षक, कुशल जादूगार, नकलाकार, नाट्यलेखक आणि अभिनेते म्हणूनही समाजात विशेष ओळख निर्माण केली आहे. लोकसंस्कृती, शिक्षण आणि समाजजागृती यांचा सुंदर संगम त्यांच्या कार्यातून सातत्याने दिसून येतो.
त्यांच्या सर्वांगीण व्यक्तिमत्त्वाचा वेध घेणारा “मस्त कलंदर” हा ग्रंथ लवकरच प्रकाशित होत असून त्याचे संपादन ज्येष्ठ साहित्यिक डॉ. मनोहर सुरवाडे यांनी केले आहे. तसेच त्यांच्या कार्यकर्तृत्वाचा गौरव करणारा “लोक रंगभूमी आणि लोक वाङ्मय” हा महत्त्वपूर्ण ग्रंथही प्रकाशनाच्या वाटेवर आहे.
डॉ. दिलीप अलोणे यांची ही विशेष मुलाखत नव्या पिढीला लोककला, नाट्य आणि समाजप्रबोधनाच्या समृद्ध परंपरेची प्रेरणा देणारी ठरणार असून वणीसह संपूर्ण विदर्भासाठी अभिमानाची बाब मानली जात आहे.
