वणी टाईम्स न्युज : “आईसारखा मायेचा वटवृक्ष या जगात दुसरा कोणी नाही. तिच्या त्याग आणि प्रेमाची जाणीव ठेवून आपण तिच्या नावे एक वृक्ष लावलाच पाहिजे.” याच संकल्पनेतून जागतिक पर्यावरण दिन 5 जून 2025 रोजी वणी नगर परिषद च्या माध्यमातून अमृत मित्र आणि दीनदयाल अंत्योदय योजना – राष्ट्रीय नागरी उपजीविका अभियान यांच्या संयुक्त विद्यमाने माझी वसुंधरा अभियान अंतर्गत “एक पेड माँ के नाम” उपक्रम नगर परिषद शाळा क्र. 7 येथे राबविण्यात आले.
या उपक्रमात क्रांती ज्योती शहर स्तर संघाच्या अध्यक्षा वनिता खंडाळकर, सोनाली तिवारी, वृणाली मस्के, दुर्गा विरूळकर, तसेच दक्ष, भोजाजी महाराज, आणि रिया बचत गटांच्या महिलांनी सक्रिय सहभाग घेतला. वृक्षारोपणानंतर झाडांचे संगोपन आणि संवर्धन करण्याची जबाबदारीही या महिलांनी घेतली आहे. कार्यक्रमाला वणी विधानसभा क्षेत्राचे आमदार संजय देरकर, माजी आमदार संजीवरेड्डी बोदकुरवार, मुख्याधिकारी सचिन गाडे, उपमुख्याधिकारी जयंत सोनटक्के प्रामुख्याने उपस्थित होते. यावेळी मान्यवरांच्या हस्ते शाळा परिसरात वृक्षारोपण करण्यात आले.
वृक्षारोपण प्रसंगी शाळेचे मुख्याध्यापक गजानन कासावार, विजय चव्हाण, दिगंबर ठाकरे , नगर परिषदेचे विविध विभाग प्रमुख, वनपाल विजय पोटे, पंकज येवले तसेच परिसरातील नागरिक मोठ्या संख्येने उपस्थित होते. विद्यार्थ्यांमध्ये पर्यावरण बाबत जागरूकता निर्माण व्हावी या हेतूने शाळा स्तरावर हा कार्यक्रम राबविण्यात आला.
