वणी टाईम्स न्युज : तालुक्यातील बाबापुर (कायर) येथील प्रसिद्ध नवसाला पावणारा गणपतीचे दर्शन घेऊन परत गावाकडे जाताना भाविकांचा ऑटो पलटी झाला. या अपघातात ऑटो चालकासह 9 महिला जखमी झाल्या. ऑटोमधील सर्व महिला झरी तालुक्यातील मांगली येथील असल्याची माहिती आहे. जखमींना उपचारासाठी रुग्णालयात दाखल करण्यात आले आहेत तर दोन महिला गंभीर असल्याची माहिती आहे.
तालुक्यातील कायरजवळ बाबापुर गावात प्रसिध्द नवसाला पावणारा गणपतीचे दर्शनासाठी भक्तांची मांदियाळी आहे. दररोज हजारो भाविक वाहनाने आणि पायदळ दर्शनासाठी बाबापुर येथे पोहचत आहे. अशातच मांगली गावातील महिला ऑटो करुन दर्शनासाठी रविवार 15 सप्टेंबर रोजी बाबापुर येथे गेल्या होत्या. गणपतीचे दर्शन करुन रात्री 7.30 वाजता दरम्यान परत गावाकडे जाण्यासाठी सर्व महिला ऑटोमध्ये बसल्या होत्या. दरम्यान कायरमार्गे लोकांची गर्दी असल्याने पोलिसांनी ऑटो चालकाला बोरगाव, मोहदा, कृष्णानपुर, पुरडमार्गे जाण्याची सूचना केली.
बाबापुर ते मोहदा मार्ग हा अत्यंत खराब असल्याने ऑटोचालक सावकाश ऑटो चालवीत होता. मोहदा गावाजवळ समोरून येणाऱ्या एका ट्रकच्या हेडलाईटच्या तीव्र प्रकाशामुळे त्याला रस्त्याची बाजू दिसली नाही, आणि ऑटो प्रवाशांसह रस्त्याच्या बाजूला शेतात पलटी झाला. या अपघातात ऑटो चालक सुभाष धोटे सह 7 महिला भाविकांना किरकोळ इजा झाली. तर दोन महिला गंभीर जखमी असल्याची माहिती आहे.
