वणी टाईम्स न्युज : महाराष्ट्राचे आराध्य दैवत छत्रपति शिवाजी महाराज यांचे जन्म मराठी तिथी फाल्गुन कृष्ण 3 रोजी झाल्याची मान्यता आहे. त्या अनुषंगाने महाराष्ट्र नवनिर्माण सेनेकडून दरवर्षी तिथीनुसार शिवजयंतीचे आयोजन करण्यात येते. मनसे नेते राजू उंबरकर यांच्या संकल्पनेतून याही वर्षी वणी शहरात छत्रपती शिवाजी महाराज चौकात उद्या सोमवार 17 मार्च रोजी भव्य दिव्य कार्यक्रमाचे आयोजन करण्यात येणार आहे.
या कार्यक्रमात छत्रपती शिवाजी महाराज चौक येथे स्थापित शिवाजी महाराज्यांच्या अश्वारूढ पुतळ्याची आकर्षक सजावट, विद्युत रोषणाई व फटाक्याची अतिशाबाजी प्रमुख आकर्षण राहणार आहे. शिवाय ताशांचा गजर, नृत्य, झांजांचा निनाद, आकर्षक देखावा आणि लेझीम पथकाच्या दणदणीत सलामीत सायंकाळी 5 वाजता शिवजयंती सोहळा उत्साहात साजरा करण्यात येणार आहे.
भव्य दिव्य आयोजनाची मनसेची परंपरा कायम ठेवत याही वर्षी शिवजयंती सोहळ्यानिमित्त संपूर्ण वणी परिसर भगवामय करून, चौकाचौकात भगव्या कमानी, झेंडे आणि शिवाजी महाराजांचे वर्णन करणाऱ्या पोवाड्यांमुळे वातावरणात चैतन्य निर्माण करण्यात येईल. सकाळी 7 वा. महाराजांच्या पुतळ्यास महाअभिषेक नंतर शिवभक्तां कडून छत्रपती शिवरायांच्या अश्वारूढ पुतळ्यास अभिवादन करण्यात येईल. सायंकाळी ढोल ताशांच्या गजरात आणि फटाक्यांच्या आतिषबाजीसह शिवजयंती सोहळा संपन्न होईल. अशी माहिती महाराष्ट्र नवनिर्माण सेने कडून देण्यात आली. या कार्यक्रमाचा सर्व जनतेने लाभ घ्यावा असे आवाहन पक्षनेते राजू उंबरकर यांनी केले आहे.
