वणी टाईम्स न्युज : तालुक्यातील शेलु (खुर्द) गावालगत नाल्यात दुचाकीसह युवकाचा मृतदेह आढळला. सदर घटना सोमवारी सकाळी उघडकीस आली. दुचाकीवरून जात असताना अंधारात पुलावरुन नाल्यात पडला असेल असा अंदाज लावण्यात येत आहे. उमेश मारोती सातपुते (35) रा. शेलु (खुर्द) असे मृत व्यक्तीचे नाव आहे. घटनेबाबत पोलिसांना माहिती मिळताच त्यांनी घटनास्थळ गाठून पंचनामा करुन मृतदेह शवविच्छेदनासाठी वणी ग्रामीण रुग्णालयात पाठविले.
प्राप्त माहितीनुसार रविवारी सायंकाळी गावात एका ठिकाणी गणपतीचे जेवण होते. उमेशने त्याठिकाणी जेवण केले, त्यानंतर तो रात्री घरी पोहचलाच नाही. सोमवारी सकाळी गावातीलच काही नागरिकांना नांदेपेरा मार्गावरील नाल्यावर पुलाखाली उमेश हा त्याच्या दुचाकीसह मृतावस्थेत पडून दिसला. याबाबत तात्काळ वणी पोलिसांना सूचना देण्यात आली.
जेवण केल्यानंतर रात्रीच्या वेळी उमेश हा दुचाकीवर गावाबाहेर कुठे जात होता ? दुचाकीवर तो एकटाच होता की त्याच्यासोबत कुणी होता ? दुचाकी चलवितानी त्यांनी मद्य प्राशन केला होता का ? उमेशचा मृत्यू हा अपघात आहे की घातपात ? याबाबत पोस्टमार्टम रिपोर्ट आल्यानंतर स्पष्ट होणारआहे.
