वणी टाईम्स न्युज : वेस्टर्न कोलफिल्ड कर्मचारी सहकारी पतसंस्था मर्या. राजूर कॉलरी येथे सव्वा कोटी रुपयांचा अपहार केल्याप्रकरणी पतसंस्थेच्या अध्यक्षांसह चार जणांवर वणी पोलीस ठाण्यात गुन्हा दाखल करण्यात आला आहे. या प्रकरणी तालुका लेखा परीक्षक अभय वसंतराव निकोडे यांनी वणी पोलीस स्टेशनमध्ये तक्रार दाखल केली आहे.
पोलिसांनी दिलेल्या माहितीनुसार आरोपी पतसंस्थेचे अध्यक्ष दिलीप जानबा टेंबूर्डे , सचिव, रमेश मोलीराम कनोजीया, लिपिक संजय अर्जुन शेटीया व तत्कालीन लिपीक मदन कृष्णाजी अंडूस्कर यांनी संगनमत करून 01 एप्रिल 2018 ते 31 मार्च 2024 या कालावधीत तब्बल 1 कोटी 27 लाख 9 हजार 801 रुपयांचा अपहार केला.
आरोपींनी संस्थेच्या सीसी कर्ज खात्यातील रक्कमा परस्पर विड्रॉल केल्या. संस्थेचे अध्यक्ष आणि सचिव यांना आर्थिक व्यवहार करण्याच्या अधिकाराचा गैरवापर करून बनावट चेकच्या साहाय्याने वेळोवेळी पैसे काढले. काढलेली रक्कम त्यांनी कॅशबुकला जमा न करता स्वतःच्या फायद्यासाठी अपहार केला. या अपहारातून संस्थेचे मोठे आर्थिक नुकसान झाले असून आरोपींनी स्वतःला आर्थिक लाभ करून घेतला, असे तक्रारीत म्हटले आहे.
या प्रकरणी पोलिसांनी आरोपी दिलीप जानबा टेंबूर्डे, रमेश मोलीराम कनोजीया, संजय अर्जुन शेटीया व मदन कृष्णाजी अंडूस्कर विरुद्ध भादंवि कलम 406, 409, 420, 467, 468, 471, 34, 120 (ब) अंतर्गत गुन्हा दाखल केला आहे. प्राथमिक तपास पोलीस निरीक्षक वणी गोपाल उंबरकर करीत आहेत.
