वणी टाईम्स न्युज: नवरा काही काम धंदा करत नाही, त्यामुळे घरचा दैनंदिन खर्च भागविणे मुश्किल. अशातच गावातील एक इसम अधून मधुन तिला आर्थिक मदत करायचा. संपर्कात असल्यामुळे ती त्या इसमासोबत बोलायची. परंतु विवाहित बहिणीचा हा व्यवहार भावाला आवडत नव्हता. एका दिवशी तिचा मोठा भाऊ व बहिणीचा नवरा घरी आले. रात्री चर्चा करीत असताना भावाने बहिणीला त्या व्यक्तीसोबत बोलण्यास मनाही केली.
मात्र रोशनी (बदललेले नाव) हिने भावाला स्पष्ट सांगितले की नवरा काही कमवत नसल्यामुळे ती विजय (बदललेले नाव) यांच्याकडून मदत घेत आहे. आणि पुढेही त्याच्या सोबत बोलणार. बहिणीच्या व्यवहाराने समाजात होणारी बदनामीमुळे संतप्त भावाने रागाच्या भरात घरात ठेवलेली काठी उचलून रोशनीच्या डोक्यावर व डाव्या पायाच्या मांडीवर जोरदार मारहाण केली. या हल्ल्यात तिच्या डोक्याला जखम होऊन रक्तस्राव झाला, तसेच पाय सुजला. मारहाणीनंतर भावाने तिला विजय सोबत पुन्हा बोलताना आढळल्यास गंभीर परिणाम भोगण्याची धमकी दिली.
सदर प्रकरणी फिर्यादी बहीण हिने दिलेली तक्रार तसेच मेडिकल रिपोर्टच्या आधारे शिरपूर पोलीसांनी आरोपी भावाविरुद्ध कलम 118 (1), 352 (2) नुसार गुन्हा दाखल केला.
