वणी टाईम्स न्युज : गर्दीच्या ठिकाणी दुचाकीला कट लागला म्हणून 63 वर्षीय वृद्धाला त्याचे घरी जाऊन मारहाण केल्याची तक्रार गुरुवारी रात्री 8.30 वाजता वणी पोलीस ठाण्यात दाखल करण्यात आली. अर्पित अग्रवाल (25), विजय अग्रवाल (55) व संजय गोयल (50) रा. वणी असे मारहाण करणाऱ्या आरोपीचे नाव आहे. फिर्यादी कृष्णकुमार नंदकिशोर वर्मा (63), रा. राम मंदिर जुनी स्टेट बँक जवळ वणी यांनी याबाबत तक्रार नोंदविली.
तक्रारीनुसार फिर्यादी गुरुवारी सायंकाळी 6 वाजता सुमारास त्यांच्या मोटरसायकलवर गांधी चौकातून घराकडे जात होते. दरम्यान गांधी चौकाकडे जात असलेल्या अर्पित अग्रवाल याच्या दुचाकीचा त्यांच्या दुचाकीला कट लागला. त्यामुळे दोघांमध्ये शाब्दिक बाचाबाची झाली. नंतर फिर्यादी दुर्लक्ष करून घराकडे निघून गेला. मात्र अर्पित हा त्यांच्या मागेच घरी आला व फिर्यादी सोबत परत वाद करुन शिवीगाळ केली.
त्यानंतर अर्पित अग्रवाल यांनी फोन करून त्याचे वडील विजय अग्रवाल यांना बोलाविले. विजय अग्रवाल यांनी फिर्यादी यास शिवीगाळ व थापड बुक्क्यांनी मारहाण केली. शिवाय त्यांच्या सोबत आलेला संजय गोयल यांनीसुद्धा शिवीगाळ केल्याचे तक्रारीत नमूद करण्यात आले आहे. फिर्यादी यांची पत्नी भांडण सोडविण्यासाठी मधात आली असता तिलाही शिवीगाळ व ढकलढुकल केल्याचा आरोप फिर्यादी यांनी लावला आहे. फिर्यादी कृष्णकुमार नंदकिशोर वर्मा यांच्या तक्रारीवरून पोलिसांनी गैरअर्जदार विरुद्ध कलम 115(2), 352, 351(2), 351(3) BNS नुसार गुन्हा दाखल केला.
