वणी टाईम्स न्युज : शेतातील कपाशीच्या पिकाला वन्य प्राण्यांपासून वाचविण्यासाठी थेट कुंपणाच्या तारेत जिवंत वीज प्रवाहाचा धक्का लागून एका शेतकऱ्याचा जागीच मृत्यू झाला. वणी तालुक्यातील नेरड (पुरड) शेत शिवारात ही घटना शुक्रवारी सायंकाळी उघडकीस आली. विठ्ठल आनंदराव जूनगरी (40), रा. नेरड (पू.) असे मृत शेतकऱ्याचे नाव आहे.
मिळालेल्या माहितीनुसार विठ्ठल जुनगरी हा बैलांचा चारा आणण्यासाठी शेतात गेला होता. बैलबंडीमध्ये कुटार भरेपर्यंत त्यांनी बैलांना चरण्यासाठी सोडले असता बैल नाल्याकडे निघून गेले. बैलांच्या शोधात विठ्ठल शेतलगत कुचनकर यांच्या शेताकडे गेला असता त्याच्या शेतातील तारांच्या कुंपणात प्रवाहित विजेचा जोरदार झटका लागून तो कुंपणावर पडला आणि त्याचा जागीच मृत्यू झाला.
चारा आणायला दुपारी शेतात गेलेला विठ्ठल अंधार पडूनही घरी आला नाही. त्यामुळे त्याच्या शोधात कुटुंबीय व गावकऱ्यांनी शेतात जाऊन पाहिले असता त्याचा मृतदेह कुंपणावर पडून होता. घटनेची माहिती मिळताच गावकऱ्यांनी घटनास्थळी धाव घेतली. घटनेबाबत मुकुटबन पोलीस ठाण्यात सूचना देण्यात आली असता पोलिसांनी मृतदेह शवविच्छेदनासाठी वणी ग्रामीण रुग्णालयात पाठविले आहे.
