सुशील ओझा, मुकुटबन : पोलीस स्टेशन अंतर्गत घोन्सा गावातून मोटरसायकल चोरी करणाऱ्या आरोपीला मुकुटबन पोलिसांनी अटक केली. आरोपीकडून चोरी गेलेली मोटरसायकल पोलिसांनी जप्त केली. अनिल उर्फ लहानच्या बापूजी टेकाम (32) रा. घोन्सा असे दुचाकी चोरट्याचा नाव आहे. फिर्यादी रुपेश चंद्रशेखर राजूरकर यांनी मुकुटबन पोलीस ठाण्यात दुचाकी चोरी गेल्याची तक्रार नोंदविली होती.
तक्रारीनुसार फिर्यादी हा 6 डिसे. रोजी रात्री 11 वाजता त्याची MH29 CC 2045 क्रमांकाच्या स्प्लेंडर प्लस मोटरसायकलने वणी येथून आला होता. दरम्यान त्याच्या मोबाईलवर फोन आल्याने मोटरसायकल एका पानटपरीच्या बाजूला उभी करुन थोडी दूर गेला. दरम्यान कुणीतरी अज्ञात इसमाने त्याची दुचाकी लंपास केली. इकडे तिकडे शोध घेऊनही मोटरसायकल मिळून आली नाही. त्यामुळे त्यांनी मुकुटबन पोलीस ठाण्यात दुचाकी चोरीची तक्रार दाखल केली.
पोलिसांनी अज्ञात इसमाविरुद्ध चोरीचा गुन्हा नोंद करून तपास सुरू केला. तपासादरम्यान जमादार दिलीप जाधव यांनी 9 डिसे. रोजी घोन्सा बस थांब्या जवळ आरोपी अनिल उर्फ लहानच्या बापूजी टेकाम याला चोरी केलेली दुचाकीसह अटक केली. सदर प्रकरणाचा तपास ठाणेदार सुरेश म्हस्के यांच्या मार्गदर्शनाखाली दिलीप जाधव करीत आहे.
