वणी टाईम्स न्युज : मारेगाव तालुक्यातील एका गावातून अल्पवयीन तरुणी बेपत्ता झाल्याची घटना समोर आली आहे. याबाबत बेपत्ता तरुणीच्या वडिलांनी प्रेम संबंधातून तरुणीला फूस लावून पळवून नेल्याचे संशय घेत मांगरूळ येथील युवकाविरुद्ध मारेगाव पोलीस ठाण्यात तक्रार नोंदवली आहे.
फिर्यादी हे शेती व ऑटो चालक व्यवसाय करतात. त्यांची अल्पवयीन मुलगी ही मारेगाव येथील महाविद्यालयात बारावीमध्ये शिक्षण घेत होती. नुकताच बारावीचा निकाल लागला असून ती उत्तीर्ण झाली होती.
दि. ७ मे रोजी रात्री कुटुंबीयांनी जेवण करून घराच्या नवीन बांधकामावर पाणी मारुन सर्वजण झोपले. दि. ८ मे रोजी सकाळी उठल्यानंतर संबंधित अल्पवयीन मुलगी घरात दिसून आली नाही. कुटुंबीयांनी नातेवाईक, शेजारी तसेच परिसरात शोध घेतला, मात्र ती आढळून आली नाही.
दरम्यान, ग्राम मांगरुळ येथील एका युवकासोबत मुलीचे प्रेमसंबंध असल्याची माहिती कुटुंबियांना मिळाली. संशयाच्या आधारे कुटुंबीयांनी संबंधित युवकाच्या घरी जाऊन चौकशी केली असता तोदेखील घरातून बेपत्ता असल्याचे आढळले. त्यामुळे त्या युवकानेच अल्पवयीन मुलीला फूस लावून पळवून नेल्याची तक्रार पोलिसांत देण्यात आली आहे. या तक्रारीवरून मारेगाव पोलिसांनी संबंधित युवकाविरुद्ध गुन्हा नोंद करून पुढील तपास सुरू केला आहे.
