वणी टाईम्स न्युज : राजकीय आणि सामाजिक क्षेत्रात सक्रिय असलेले महाराष्ट्र प्रदेश काँग्रेस कमिटीचे सचिव संजय खाडे यांचा वाढदिवस यंदा सामाजिक बांधिलकी जपत विविध उपक्रमांनी साजरा करण्यात येणार आहे. शनिवार, दि. 23 मे रोजी दिवसभर वणी शहरात रक्तदान, साहित्य वाटप आणि व्यावसायिक कार्यालय उद्घाटन असे विविध कार्यक्रम आयोजित करण्यात आले आहेत.
कार्यक्रमाची सुरुवात सकाळी 10.30 वाजता शेतकरी मंदिर येथे होणाऱ्या रक्तदान शिबिराने होणार आहे. “रक्तदान हेच श्रेष्ठ दान” हा संदेश देत आयोजित करण्यात आलेल्या या शिबिरात नागरिकांनी उत्स्फूर्त सहभाग नोंदवावा, असे आवाहन आयोजकांनी केले आहे. वाढत्या अपघातांच्या घटना, शस्त्रक्रिया आणि विविध आजारांमुळे रक्ताची गरज कायम भासत असल्याने रक्तदानासारख्या उपक्रमाचे महत्त्व अधिक अधोरेखित होत असल्याचे आयोजकांनी सांगितले.
यानंतर दुपारच्या सत्रात वणी येथील वृद्धाश्रमात गरजू ज्येष्ठ नागरिकांना साहित्य वाटप करण्यात येणार आहे. समाजातील वयोवृद्धांविषयी कृतज्ञता व्यक्त करण्याच्या हेतूने हा उपक्रम राबविण्यात येत असून ग्रामीण रुग्णालयातील रुग्णांनाही फळांचे वितरण केले जाणार आहे.
सायंकाळी 6 वाजता “डीएसके कन्स्ट्रक्शन अँड डेव्हलपर्स” या नव्या व्यावसायिक कार्यालयाचे उद्घाटन खासदार प्रतिभा धानोरकर यांच्या हस्ते होणार आहे. या कार्यक्रमाच्या अध्यक्षस्थानी माजी शिक्षणमंत्री वसंतराव पुरके राहणार आहेत. या संस्थेचे संचालक धनंजय खाडे असून विकासाभिमुख उपक्रमांना चालना देण्याच्या उद्देशाने हा नवीन व्यवसाय सुरू करण्यात येत आहे.
दरम्यान, या सर्व कार्यक्रमांच्या आयोजनासाठी संजय खाडे फाउंडेशन, जय जगन्नाथ मल्टीस्टेट पतसंस्था, श्री लक्ष्मीनारायण पतसंस्था आणि संजय खाडे मित्रपरिवाराचे सदस्य परिश्रम घेत आहेत.
