वणी : रात्रीच्या अंधारात रस्त्याच्या बाजूला उभा ट्रक दिसून न पडल्याने दुचाकी ट्रकवर जाऊन धडकली. या भीषण अपघातात दुचाकी चालक घुग्गुस येथील युवक जागीच ठार झाला. विजय श्रावण साहू (32) रा. अमराई वार्ड घुग्गुस असे या अपघातात मृत युवकाचा नाव आहे. सदर घटना वणी घुग्गुस मार्गावर पुरड गावाजवळ रविवारी रात्री 11 वाजता दरम्यान घडली.
प्राप्त माहितीनुसार घुग्गुस येथील विजय श्रावण साहू हा काही कामानिमित्त आपल्या पल्सर मोटारसायकल क्रमांक MH 34 BC5144 ने वणी येथे आला होता. रविवारी परत घुग्गुसकडे जाताना पुरड गावाजवळ रस्त्यावर उभा असलेल्या MH 34 AB 6710 नंबरच्या कोळसा भरलेल्या ट्रकवर त्याची दुचाकी मागून आदळली. या भीषण अपघातात विजय याच्या डोक्याला जबर मार लागून त्याचा घटनास्थळी मृत्यू झाला.
अपघाता बाबत शिरपूर पोलिसांना माहिती मिळताच त्यांनी घटनास्थळ गाठून पंचनामा करून मृतदेह वणी ग्रामीण रुग्णालयात पाठविले. तसेच ट्रक चालकावर गुन्हा नोंद केला आहे. पुढील तपास शिरपूर पोलीस करीत आहे.
