सुशील ओझा, झरी : निष्काळजीपणे वाहन चालवून रिक्षा चालकाच्या मृत्यूस जवाबदार ट्रक चालकाला पाटण पोलिसांनी परभणी येथून अटक केली आहे. अपघात करून ट्रक चालक पळून गेला होता. मात्र तांत्रिक तपासानंतर पाटण पोलिसांनी अपघाताच्या सहा महिन्यानंतर फरार ट्रक चालकाला परभणी जिल्ह्यातून ताब्यात घेतला.
प्राप्त माहितीनुसार जुलै 2023 मध्ये पाटण ते बोरी मार्गावर दाभा गावाजवळ सिमेंटच्या ट्रक ने समोरून येणाऱ्या ऑटोरिक्षाला जोरदार धडक दिली. या अपघातात ऑटोरिक्षा चालक जावेद शेख याच्या जागीच मृत्यू झाला. अपघात करून पळून जात असताना सदर ट्रक टाकली गावाजवळ चिखलात फसला. मात्र चालक ट्रक सोडून फरार झाला होता.
ट्रक क्रमांकाच्या आधारावर पोलिसांनी ट्रक चालकाचा नावपत्ता शोधून काढला. परंतु आरोपी ट्रक चालक मागील सहा महिन्यापासून पोलिसांना गवसत नव्हता. अखेर तांत्रिकरित्या तपास करून पाटण पोलिसांनी आरोपी भकतराम भानुदास फुगनर रा.कार्बेटवाडी ता.सोनपेठ जिल्हा परभणी यास त्याच्या गावातून 12 डिसेंबर रोजी ताब्यात घेऊन अटक केली. सदर कारवाई पाटण पोलीस स्टेशन ठाणेदार सपोनि संदिप पाटील, शोध पथकाचे पोलीस अंमलदार सचिन गाडगे, अमित पोयाम यांनी केली.
