वणी टाईम्स न्युज: शहरातील पंचशील नगर येथे दिनांक 8 डिसेंबर रोजी आढळलेल्या अवैध गुटखा व सुगंधित तंबाखू प्रकरणी शिवसेना (उद्धव बाळासाहेब ठाकरे) प्रणित युवासेनेने दंड थोपटला आहे. गुन्हा दाखल होऊनही गुटखा तस्करांना अभय देणाऱ्या वणी पोलिस प्रशासनाविरुद्ध युवासेना उप जिल्हाप्रमुख अजिंक्य शेंडे यांनी सोमवार 26 जानेवारी रोजी पोलिस स्टेशन समोर धरणे आंदोलन सुरू केले.
उल्लेखनीय आहे की, दिनांक 8 डिसेंबर 2025 रोजी शहरातील पंचशील नगर येथे एका चारचाकी वाहनातून अवैध गुटखा व तंबाखू पुरवठा होत असताना पोलिसांनी धाड टाकली. मात्र पोलिस येताच तस्करांनी वाहनातील गुटखा व तंबाखूची पोते रस्त्यावर फेकून MH24 BL7051 क्रमांकाची Eco कारसह पळ काढला. सदर प्रकरणी दोन दिवसानंतर अन्न व औषध अधिकाऱ्याच्या फिर्यादवरून अनोळखी आरोपीविरुद्ध गुन्हा दाखल करण्यात आला.
संपूर्ण वणी उप विभागात प्रतिबंधित गुटखा व सुगंधित तंबाखू तस्करी करणाऱ्या तस्करांमध्ये कोरपना येथील मकसूद याचा नाव प्रामुख्याने चर्चिले जाते. दिनांक 8 डिसेंबर रोजी पकडण्यात असलेला तंबाखू साठाचा सूत्रधार मकसूद असल्याचे बोलले जाते. मात्र मकसूदचे स्थानिक नातेवाईक व एका नेत्याच्या मध्यस्थीने त्याच रात्री “सेटिंग” झाल्याचीही चर्चा ऐकायला मिळाली. त्यामुळे तपास अधिकाऱ्यांकडून पुढे कोणतीही कारवाई करण्यात आली नसल्याचा आरोप अजिंक्य शेंडे यांनी केला आहे.
संबंधित गुटखा तस्कराची ओळख पटवून त्याला अटक करणे, गुटखा तस्करीमध्ये वापरण्यात आलेली Eco व्हॅन क्रमांक MH24 BL7051 जप्त करणे तसेच तपासात दिरंगाई करणाऱ्या तपास अधिकारी पीएसआय सुदाम आसोरे यांचे निलंबन करण्याची मागणीला घेऊन युवासेना उप जिल्हा प्रमुख अजिंक्य शेंडे यांनी वरिष्ठ पोलिस अधिकाऱ्यांसोबत दोनदा पत्रव्यवहार केले. परंतु स्थानिक पोलिस प्रशासनाने मागणीला केराची टोपली दाखवत गुटखा तस्करांविरुद्ध तुशभरही कारवाई केली नाही. शेवटी कारवाईसाठी अजिंक्य शेंडे यांनी धरणे आंदोलनाचा हत्यार उपसला.
या आंदोलनास आमदार संजय देरकर, शिवसेना जिल्हा प्रमुख संजय निखाडे, राजू तुराणकर, आयुष ठाकरे, बंडू चांदेकर, दिलीप काकडे, गणपत लेडांगे, सुधीर थेरे, पुरुषोत्तम बुटे, लढा संघटनेचे प्रविण खानझोडे, नगरसेवक अजय धोबे यांच्यासह विविध सामाजिक व राजकीय संघटनांचे पदाधिकारी, शिवसैनिक व युवासैनिक मोठ्या संख्येने उपस्थित होते. यावेळी उपस्थितांनी पोलीस प्रशासनाविरोधात तीव्र घोषणाबाजी करत संताप व्यक्त केला.
यावेळी आमदार संजय देरकर यांनी उपविभागीय पोलीसअधिकारी व वणी पोलीस ठाण्याचे ठाणेदार यांच्याशी सविस्तर चर्चा करून पोलीस प्रशासनाला स्पष्ट शब्दांत इशारा देत, आठ दिवसांच्या आत गुटखा तस्करीसह सर्व प्रकारचे अवैध धंदे पूर्णतः बंद करून संबंधित तस्करांना अटक करण्यात यावी, अन्यथा यापेक्षा अधिक तीव्र आंदोलन छेडण्यात येईल, असा ठाम अल्टीमेटम दिला. पोलीस अधिकाऱ्यांनी लेखी व तोंडी स्वरूपात कारवाईचे आश्वासन दिल्यानंतर हे धरणे आंदोलन तात्पुरते स्थगित करण्यात आले, अशी माहिती युवासेना उपजिल्हा प्रमुख अजिंक्य शेंडे यांनी दिली.
