वणी टाईम्स न्युज : वेकोलिच्या वणी (नॉर्थ) अंतर्गत सर्व खदानींमध्ये शुक्रवार 7 मार्च पासून एच.ई.एम.एम.ऑपरेटरची भरती व प्रशिक्षण प्रक्रिया सूरु होत आहे. भरती प्रक्रियेत पारदर्शकता ठेवण्यासाठी इन कॅमेरा भरती व प्रशिक्षण प्रक्रिया राबविण्यात यावी. अशी मागणी महाराष्ट्र नवनिर्माण सेनेने केली आहे. वेकोलितील काही कामगार नेते अधिकाऱ्यांसोबत संगनमत करुन आर्थिक देवाण घेवाणच्या माध्यमातून सावळा गोंधळ करत असल्याची तक्रार महाराष्ट्र नवनिर्माण सेनेकडे प्राप्त झाली आहे. त्यामुळे भरती प्रक्रिया व प्रशिक्षण हे कॅमेऱ्याच्या समोर घ्यावे. अशी मागणी मनसेचे माजी तालुकाध्यक्ष फाल्गुन गोहोकार यांनी क्षेत्रीय महाप्रंबधकांस दिलेल्या निवेदनातून केली आहे.
इन कॅमेरा भरती प्रक्रिया न केल्यास क्षेत्रीय महाप्रंबधक या आर्थिक देवान घेवाणीत महत्वाचे सूत्रधार व हिस्सेदार असल्याचे गृहीत धरून क्षेत्रीय महाप्रंबधकाच्या विरोधात वरिष्ठाकडे तक्रार करण्यात येईल. तसेच वेकोलि विरोधात तीव्र स्वरुपाचे आंदोलन छेडण्यात येईल. असा इशारा या निवेदनातून देण्यात आला. यावेळी वणी मनसेचे माजी तालुका अध्यक्ष फाल्गुन गोहोकार, संतोष राजूरकर, प्रवीण कळसकर, धीरज बगवा, सूरज काकडे, योगेश काळे, निखिल माथनकर यांच्या सह अन्य पदाधिकारी उपस्थित होते.
