वणी टाईम्स न्युज : येत्या 6 ऑगस्ट 2025 रोजी वणी येथून शिरपूर महादेव गडापर्यंत भव्य कावड यात्रेचे आयोजन करण्यात आले आहे. या यात्रेचे नियोजन व कार्यक्रमाची रूपरेषा तयार करण्यासाठी शुक्रवार 18 जुलै रोजी सायंकाळी 6 वाजता सामूहिक बैठक व चर्चेचे आयोजन करण्यात आले आहे. स्थानिक जैताई मंदिर सभागृहात ही बैठक पार पडणार आहेत.
उल्लेखनीय आहे की काशी महाशिवपुराण कथेचे मुख्य आयोजक व धार्मिक कार्यकर्ते स्व. राजकुमार जैस्वाल यांच्या पुढाकाराने मागील वर्षी भव्य कावड यात्रेचे यशस्वी आयोजन करण्यात आले होते. यावर्षीही कावड यात्रा काढण्याचा राजा जैस्वाल यांचा मानस होता. परंतु दुर्दैवाने केदारनाथ येथे झालेल्या हेलिकॉप्टर अपघातात राजा जैस्वाल, त्यांची पत्नी श्रद्धा जैस्वाल व मुलगी काशी हिचा अकाली मृत्यू झाला. राजा जैस्वाल यांनी सुरु केलेल्या कावड यात्रेत खंड पडू नये, म्हणून त्यांच्या मित्र मंडळीने दरवर्षी कावड यात्रा आयोजन करण्याचे ठरविले आहे.
याच निमित्ताने विविध विषयांवर चर्चा, विचार विनिमय व नियोजन करण्याकरिता शुक्रवारी बैठकीचे आयोजन जैताई मंदिर सभागृहात करण्यात आले आहे. या सभेत शहरातील सर्व शिवभक्त, गणमान्य नागरिक, सेवाभावी कार्यकर्ता, संस्था, तसेच कावड यात्रेदरम्यान सहभाग नोंदविण्यास इच्छुक व्यक्तींनी या बैठकीत हजर रहावे. अशी विनंती कावड यात्रा समिती तर्फे करण्यात आली आहे.
