वणी टाईम्स न्युज : नगरपरिषद निवडणुकीच्या पार्श्वभूमीवर भारतीय जनता पक्षाने आपले संकल्पपत्र जाहीर केले आहे. राष्ट्रीय मागासवर्गीय आयोगाचे अध्यक्ष हंसराज अहीर यांच्या हस्ते मंगळवारी भाजपच्या संकल्प पत्राचे विमोचन करण्यात आले. ‘विकसित भारत – विकसित महाराष्ट्र – विकसित वणी’ या घोषवाक्याखाली प्रसिद्ध करण्यात आलेल्या या संकल्पपत्रात पाणीपुरवठा, आरोग्य, शिक्षण, पायाभूत सुविधा आणि नागरिकांसाठी आधुनिक सुविधांची निर्मिती या महत्त्वाच्या मुद्द्यांवर विशेष भर देण्यात आला आहे.
संकल्पपत्रात नागरिकांच्या दैनंदिन अडचणी दूर करण्यासाठी अनेक ठोस उपक्रमांचा समावेश करण्यात आला असून, शहरी भागातील रस्ते, नालीकाम, पिण्याच्या पाण्याचे शुद्धीकरण, सांडपाणी व्यवस्थापन, प्रकाशव्यवस्था आणि स्वच्छता यासारख्या मूलभूत सेवांच्या उभारणीत गुणवत्तेला सर्वोच्च प्राधान्य देण्याची भूमिका भाजपने मांडली आहे.
शहरात डिजिटल सुविधा वाढविणे, आरोग्यकेंद्र उभारणी, युवक-युवतींसाठी व्यावसायिक प्रशिक्षण उपक्रम, सांस्कृतिक भवन, क्रीडा संकुले, कचरा प्रक्रिया प्रकल्प, तसेच सार्वजनिक कार्यक्रमांसाठी स्वतंत्र प्रशस्त नाट्यगृह अशा अनेक योजनांचा आराखडा या संकल्पपत्रात समाविष्ट आहे.
भाजपने यापूर्वीच्या कार्यकाळात केलेल्या कामांची माहितीही संकल्पपत्रातून दिली असून, नागरिकांच्या विश्वासामुळेच विकासाचे अनेक प्रलंबित प्रश्न मार्गी लागल्याचे नमूद करण्यात आले आहे. आगामी कार्यकाळात शहराचा विकास हा केंद्रबिंदू ठेवून सातत्यपूर्ण आणि नियोजित कामकाज होईल, असा विश्वासही पक्षाने व्यक्त केला आहे.
निवडणुकीत मतदारांचा कौल मिळाल्यास वणी शहराला आधुनिक, स्वच्छ, सुसज्ज आणि सशक्त स्वरूप देण्याचा संकल्प पक्षाने मांडला आहे. भाजपच्या पदाधिकारी व उमेदवारांच्या उपस्थितीत संकल्पपत्राचे वितरण होत असून, शहराच्या भविष्याचे एक व्यापक दृष्टीचित्र मतदारांसमोर ठेवण्यात आले आहे. शेवटी 2 डिसेंबर रोजी होणाऱ्या निवडणुकीत नगराध्यक्ष व नगरसेवक पदाचे भारतीय जनता पक्षाच्या उमेदवारांना प्रचंड बहुमताने विजयी करण्याचे आवाहन या संकल्प पत्रात करण्यात आले आहे.
