वणी टाईम्स न्युज : रस्त्यालगत उभा केलेला कोळसा वाहतूक करणारा 18 चाकी हायवा ट्रक अज्ञात चोरट्यांनी लांबविल्याची धक्कादायक घटना उघडकीस आली आहे. नांदेपेरा मार्गावर भरदिवसा घडलेल्या या घटनेबाबत ट्रक चालक बबलु सिताराम पासवान (३५) रा. विठ्ठलवाडी, वणी यांनी पोलीस ठाण्यात लेखी तक्रार दाखल केली आहे.
तक्रारीनुसार, फिर्यादी यांनी २६ डिसेंबर रोजी सकाळी एकोणा कोळसा खाणीतून आपले ट्रक क्रमांक MH34BH 2686 मध्ये कोळसा भरून लालपुलिया येथील गुप्ता कोल यांच्या प्लॉटवर खाली केला. कोळसा खाली करून दुसरी फेरी घेण्यासाठी ते नांदेपेरा रोडने जात असताना फिर्यादी यांना फोनद्वारे त्यांची मुलीची प्रकृती अचानक बिघडल्याची माहिती मिळाली.
त्यामुळे फिर्यादी ट्रक चालकाने तातडीने घरी जाण्यासाठी मजरा गावाजवळील मारोती मंदिराजवळ रस्त्याच्या कडेला ट्रक उभा करून ऑटोरिक्षाने वणी येथे घरी गेला. मुलीवर उपचार करून सुमारे साडेअकरा वाजताच्या सुमारास तो परत आला असता, उभा केलेला ट्रक त्या ठिकाणी आढळून आला नाही. परिसरात शोध घेतल्यानंतरही ट्रक सापडला नाही.
अखेर फिर्यादी यांनी याबाबत ट्रान्सपोर्ट मालक अशिष गुप्ता यांना माहिती दिली. त्यांनीही घटनास्थळी येऊन परिसरात शोध घेतला, मात्र ट्रकचा कोणताही मागमूस लागला नाही. शेवटी फिर्यादी ट्रक चालक बबलु सिताराम पासवान यांनी त्यांच्या ताब्यातील व ते गैरहजर असताना 18 चाकी ट्रक (किंमत 58 लाख रुपये) अज्ञात चोरट्यांनी लांबविल्याची तक्रार दाखल केली. तक्रारीच्या आधारे पोलिसांनी अज्ञात आरोपींविरुद्ध कलम 303 (2) नुसार गुन्हा नोंदवून ट्रकचा शोध सुरू केला आहे.
