वणी टाईम्स न्युज: निवडणुकांची घामघुम सुरु असताना शहराच्या मध्यभागी असलेल्या गाडगेबाबा चौकात एका व्यावसायिकाच्या घरी 5 ते 6 दरोडेखोरांनी धाडसी दरोडा टाकल्याने एकच खळबळ उडाली आहे. शनिवारी मध्यरात्रीनंतर 1 ते 2 वाजता दरम्यान घडलेल्या या घटनेत दरोडेखोर तब्बल 18 ते 20 लाख रूपयांचा ऐवज लुटून पसार झाले. दरोडखोरांनी वृद्ध घरमालक संजय निळकंठराव कोंडावार (76) यांच्यावर चाकूने हल्ला करून जखमी केले.
मिळालेल्या माहितीनुसार शहरातील गाडगेबाबा चौक परिसरात अश्विन कोंडावार यांचे कोंडावार ज्वेलर्स नावाने सराफा दुकान आहे. दुकानाच्या बाजूने त्यांचे काका संजय कोंडावार यांचे घर आहे. संजय कोंडावार यांना अपत्य नसून त्यांच्या पत्नीचेही निधन झाले. त्यामुळे ते घरात एकटेच राहतात. शनिवारी रात्री 1 ते 1.30 दरम्यान 5 ते 6 दरोडेखोरांनी दुकानाचे चौकीदार याला उठवून मालकाला आवाज द्यायला भाग पाडले. संजय कोंडावार यानी घराचा दार उघडताच लुटारू आत शिरले.
दरोडेखोरांपैकी एकाने वृद्ध संजय कोंडावार यांचे हात कसून पकडले. तर एकाने त्यांच्या गळ्यातील सोन्याची चेन काढली. कोंडावार यांनी प्रतिकार केला असता दरोडेखोरांनी त्यांच्या चाकूने वार केला. मात्र त्यांनी हात आडवा केल्याने चाकूचा वार हातावर बसला. त्यानंतर लुटारूंनी लोखंडी कपाट फोडून ड्रॉवर मध्ये ठेवलेले 4.50 लाख रुपये रोख तसेच तब्बल 100 ते 120 ग्राम सोन्याचे दागिने काढून पसार झाले.
घटनेची माहिती मिळताच वणी पोलिस घटनास्थळी दाखल झाले. दरोडेखोरांचा शोध घेण्यासाठी यवतमाळ येथून डॉग स्क्वाड व फिगरप्रिंट एक्सपर्ट यांना पाचारण करण्यात आले आहे. शहराच्या मध्यभागी घडलेल्या या घटनेमुळे व्यापारी वर्गात तसेच नागरिकांत दहशत निर्माण झाली आहे. शहरात पोलिसांची नाईट पेट्रोलिंग सुरु असताना मुख्य रस्त्यावरील घरात घडलेल्या धाडसी दरोड्याच्या या घटनेमुळे पोलिसांची कार्यप्रणालीवरही प्रश्न उपस्थित होत आहे.
