वणी टाईम्स न्युज: सोमवारी रात्री वणी मार्डी मार्गावर फिस्की जंगलात घडलेल्या दरोड्याच्या घटनेत 3 लाख रुपयांची बॅग सुदैवाने बचावली. दरोडाखोरांनी रक्कम लुटण्याच्या उद्देशाने धावत्या बाईकला लाथ मारुन खाली पाडली. मात्र त्याच वेळी बाईकच्या टाकीवर ठेवलेली बॅग उसळून रस्त्याच्या कडेला कचऱ्याच्या ढिगाऱ्यात जाऊन पडली. नेमकं त्याचवेळी समोरून काही वाहन येत असल्याचे पाहून बाईकस्वार तिघही दरोडेखोर तेथून रिकामी हाती पसार झाले. त्यामुळे दरोड्याचा प्रयत्न फसला.
मिळालेल्या माहितीनुसार चोपण गावातील चेतन विजय चिंचोळकर (25) हा शेती खरेदीच्या कामासाठी 3 लाख रुपये घेऊन दुचाकीने वणी येथून गावाकडे जात होता. दरम्यान रात्री 8.40 वाजता दरम्यान मार्डी ते बामर्डा जंगल रस्त्यावर समोरुन आलेल्या बाईकसवार तिघांनी पुढे जाऊन बाईक पलटून आणली. त्यांनी वेगाने चेतनच्या बाइकचा पाठलाग करुन लुटण्याच्या उद्देशाने एकाने धावत्या बाईकला लाथ मारून चेतनला खाली पाडले.
या सर्व घडामोडी दरम्यान चेतन याच्या बाईकच्या पेट्रोल टाकीवर ठेवलेली बॅग उसळून रस्त्याच्या कडेला झाडपाल्याच्या कचऱ्यात जाऊन पडली. दरोडेखोर युवकांनी चेतनच्या बाईकची झडती घेतली असता त्यांना काहीही मिळाले नाही. दरम्यान समोरुन काही वाहन येत असल्याचे पाहून दरोडेखोर तेथून पसार झाले. इकडे बाईकवरील बॅग दिसून न पडल्याने दरोडेखोर बॅग घेऊन पळून गेले असावे असे चेतनला वाटले.
दरोड्याच्या या घटनेबाबत त्यांनी लगेच मारेगाव पोलीस ठाण्यात माहिती दिली. पोलिसांनी सकाळी घटनास्थळ पंचनामा केला असता रस्त्याच्या कडेला झाडपाल्याच्या कचऱ्यात बॅग दिसून पडली. पोलिसांनी बॅग उघडून पाहिली असता त्यामध्ये 3 लाख रुपये व कागदपत्रे सुरक्षित आढळले. तर दरोड्याच्या प्रयत्न करणाऱ्या तिघं युवकाचा मारेगाव पोलिस शोध घेत आहे. दरोड्याच्या या घटनेमुळे वणी नांदेपेरा वडकी या मार्गावर प्रवास करणाऱ्या प्रवाशांत दहशत पसरली आहे.
बातमीची घाई आणि चुकीची माहिती !
मार्डी मार्गावर दरोड्याच्या घटनेबाबत काही न्युज पोर्टलने ‘सर्वात आधी बातमी’ च्या नादात दरोडेखोरांनी 3 लाख रुपयांनी भरलेली बॅग लुटून नेल्याच्या बातम्या प्रकाशित केल्या. वास्तविक पाहता घटनेची सखोल माहिती न घेता एकमेकाच्या बातम्या कॉपी करुन छापल्यामुळे चुकीची माहिती वाचकांपर्यंत पोहचली.
