वणी टाईम्स न्युज: शहरात गुंडगिरी व गुन्ह्याच्या विरोधात कडक पाऊले उचलत शहर पोलिसाने एका वर्षात एमपीडीए कायद्याअंतर्गत सलग दुसरी कार्यवाही केली आहे. शहरालगत चिखलगाव येथील कुख्यात गुंड अमोल उर्फ भुऱ्या विजय ठाकरे (31) रा. रामनगर चिखलगाव याच्यावर एमपीडीए कायद्याने कारवाई करून गुरुवारी रात्री अटक करण्यात आली आहे. अटक केल्यानंतर अमोल ठाकरे यांची जिल्हा मध्यवर्ती कारागृह नागपूर येथे स्थानाबद्धसाठी रवानगी करण्यात येणार आहे.
अमोल ठाकरे विरुध्द अनेक गुन्हे दाखल असल्याने उप विभागीय पोलीस अधिकारी वणी व ठाणेदार पोलिस स्टेशन वणी यांनी महाराष्ट्र झोपडपट्टी दादा, हाथभट्टीवाले, औषधीद्रव्ये विषयक गुन्हेगार, धोकादायक व्यक्ती, रेती माफीया व जिवनावश्यक वस्तुचा काळाबाजार करणारे यांच्या विघातक कृत्यांना आळा घालण्याबाबत अधिनियम 1981 अन्वये स्थानबध्द करण्या बाबतचा प्रस्ताव पोलिस अधीक्षक,यवतमाळ यांचे मार्फतीने जिल्हाधिकारी तथा जिल्हा दंडाधिकारी, यवतमाळ यांना सादर केला होता. त्याअनुषंगाने जिल्हादंडाधिकारी, यवतमाळ यांनी अमोल ठाकरे यास स्थानाबध्द आदेश जारी केले. आदेशानुसार अमोल ठाकरे याला वणी पोलिसांनी अटक केली.
वणी पोलीस स्टेशनचे प्रभार सांभाळल्यानंतर ठाणेदार पोलीस निरीक्षक गोपाल उंबरकर यांनी एमपीडीए अंतर्गत सलग दुसरी कारवाई करून गुंड प्रवृतीच्या लोकांना “कायद्यात राहाल तर फायद्यात राहाल” असा इशारा दिला आहे. यापूर्वी शहरातील कुख्यात सट्टाकिंग जमीर खान उर्फ जम्मू याच्यावर एमपीडीए कायद्याने कारवाई करून भंडारा जिल्हा कारागृहात स्थानबद्ध करण्यात आले आहे.
