वणी टाईम्स न्युज: शहरालगत चिखलगाव परिसरातून एका अल्पवयीन परप्रांतीय मुलगी बेपत्ता होण्याची घटना उघडकीस आली असून याप्रकरणी वणी पोलीस स्टेशन येथे तक्रार दाखल करण्यात आली आहे. तक्रारीच्या अनुषंगाने पोलिसांनी अज्ञात व्यक्तीविरुद्ध मुलीला फूस लावून पळवून नेल्याचा गुन्हा दाखल केला आहे.
पोलिसांकडून मिळालेल्या माहितीनुसार, संबंधित कुटुंब मूळचे छत्तीसगड राज्यातील असून सध्या वणी यवतमाळ मार्गावर लालपुलिया परिसरात मजुरी करून उदरनिर्वाह करत आहे. दि. 22 फेब्रुवारी 2026 रोजी सकाळी सुमारे 7.30 वाजताच्या सुमारास अल्पवयीन मुलगी घराबाहेर फिरण्यासाठी गेली होती. मात्र बराच वेळ उलटूनही ती परत न आल्याने कुटुंबीयांनी परिसरात तसेच वणी शहरात तिचा शोध घेतला. सलग तीन दिवस शोध घेऊनही मुलगी न सापडल्याने दि. 25 फेब्रुवारी रोजी पोलिसांत तक्रार नोंदविण्यात आली.
तक्रारीनुसार, अज्ञात इसमाने त्यांच्या अल्पवयीन मुलीच्या अज्ञानतेचा फायदा घेत फूस लावून पळवून नेल्याचा संशय व्यक्त करण्यात आला आहे. प्रकरणाचे गांभीर्य लक्षात घेऊन पोलिसांनी तपास सुरू केला आहे.
