वणी टाईम्स न्युज : चंद्रपूर येथे जाण्यासाठी बसमध्ये चढत असताना एक वृद्ध नागरिकाच्या गळ्यातील सुमारे 60 हजार रुपये किमतीची सोन्याची तुळशीमाळ अज्ञात चोरट्याने चोरून नेल्याची घटना समोर आली आहे. ही घटना दिनांक 2 जुलै रोजी दुपारी 3 वाजताच्या सुमारास वणी बस स्थानकावर घडली असून याप्रकरणी वणी पोलीस स्टेशनमध्ये जबानी रिपोर्ट देण्यात आला आहे.
फिर्यादी रविंद्र वसंतजीभाई करिया (66) रा. गंजवाड वार्ड, चंद्रपूर निवृत्त असून यवतमाळ जिल्ह्यातील कळंब येथे त्यांची शेती आहे. शेती पाहण्यासाठी ते नेहेमी चंद्रपूर येथून कळंब येथे ये-जा करत असतात. 2 जुलै रोजी ते वणी बसस्थानकावरून चंद्रपूरकडे जाणाऱ्या बसमध्ये चढत असताना गर्दीचा फायदा घेऊन अज्ञात चोरट्याने त्यांच्या गळ्यातील अंदाजे 15 ग्रॅम वजनाची सोन्याची तुळशीमाळ (60 हजार) चोरून नेली.
माळ चोरीला गेल्याचे लक्षात येताच त्यांनी तत्काळ शोधाशोध केली मात्र माळ कुठेही सापडली नाही. त्यानंतर त्यांनी वणी पोलीस स्टेशन गाठून जबानी तक्रार नोंदवली. तक्रारीवरून पोलिसांनी अज्ञात चोरट्याविरुद्ध कलम 303(2) नुसार गुन्हा दाखल केला आहे. वणी बसस्थानक परिसरात गर्दीच्या वेळी अशा प्रकारच्या चोरीच्या घटना घडत असल्यामुळे प्रवाशांनी सावधगिरी बाळगण्याचे आवाहन पोलिस निरीक्षक गोपाल उंबरकर यांनी केले आहे.
